18 sa 20 brgy kan Milaor drug cleared, sabi kan PDEA

Milaor, Camarines Sur --- Orgulyo ngunian kan Philippine Drug Enforcement Agency (PDEA), Municipal Police Station, LGU asin iba pang ahencia de gobierno matapos kunfirmaron na 18 sa 20 barangay kan banwaan na ini bilang ‘‘drug cleared’’ na sa ilegal na droga.


Si P/SMS Nino Bragais, parataram kan MPS Milaor nagpahayag na si pinakahuring pig-declara bilang mga ‘‘drug cleared’’ barangay kan Regional Oversight Committee (ROC) kan Febrero 4, 2022 iyo an Dalipay, Capucnasan, Del Rosario, asin Maycotmo mantang an duwa nalang natatada iyo an barangay Sto. Domingo asin Mayawpayawan.


An ROC pinamamayohan kan regional director kan PDEA asin ini compuesto kan lokal na gobierno, Municipal Police Station kan Milaor, Municipal Health Office, asin Department of Social Welfare and Development (DSWD).


Halaba an listahan kan mga rekisitos na pigmamando kan ROC alagad sainda munang pigserne kun dapat nang ideclarang drug cleared an 18 kan 20 barangay kan Milaor na sakop kan 2nd congressional district kan Camarines Sur, sabi pa ni Bragais.


An barangay nagrecibe nin Certificate of Resolution of Drug Cleared and Drug Free Barangay hale sa PDEA Bicol.


Alagad an barangay Tarusanan declarado muna bilang barangay free status mantang an barangay na ini mayong nagsuko sa awtoridad na envuelto sa ilegal na droga.


An Milaor napapalibotan nin mga banwaan asin Ciudad nin Naga na may mga envuelto sa droga alagad kun igwa man naglalaog asin nagdadayo sana. Prueba kaini, si saindang nadakop na suspechado sa buy bust operation kan PDEA asin PNP kan Febrero 3 bako man residente kan banwaan envez hale sa Naga.


Si Police Lt. Suzutte G. Pili, jefe de pulicia kan MPS Milaor nagsabi nagpapadagos an saindang campanya laban sa droga sa duwa pang natatadang barangay. Pasalamat man an MPS sa lokal na gobierno sa pamamayo ni Alcalde Anthony Reyes huli kan cooperasyon sa paglaban sa ilegal na droga.


Sa Ciudad nin Naga na kataid kan banwaan nin Milaor, na may 27 barangay lima nang barangay an pigdeclara kan PDEA na drug cleared asin ini kinababalihan kan Tinago, San Francisco, Bagumbayan Norte, Sta Cruz, asin Panicuason, alagad an ahencia nagkakaigwa giraray nin ‘‘revalidation’’ (DPAureus)