2 Angat Buhay Village ni VP Leni, binasbasan

Pinangenotan ni Bise Presidente Leni Robredo kan Domingo, Hunyo 6 asin Lunes, Hunyo 7 an magkasuhay na groundbreaking sa saiyang proyektong Angat Buhay Village sa Sagñay asin Calabanga gabos sa Camarines Sur sa irarum kan saindang BAHAYanihan initiative nganing matabangan an mga familia yaon sa landside prone area.


Sa Sagñay, na ginibo an ceremonia kan Hunyo 6 sa Sitio Lapurisima, Nato kaibanan sinda Diputado Arnie Fuentebella, Sagñay Mayor Jovic Fuentebella, na naging posible sa tabang kan Movement for Good Governance and Ethical Leadership, University of Nueva Caceres.


Katuwang sa proyekto sinda diputado Fuentebella, LGU Sagñay, barangay Nato asin iba pang pribadong organisasyon.


Dinara ni Robredo an proyekto sa Sitio La Purisima, barangay Nato mantang an sitio sarong landslide prone area huli ta dakul na mga residentes digdi an nawaran nin mga harong asin may mga binawian nin buhay huli kan mahiwas na laila kan paghuros kan daga pasiring sa kadagatan kan agihan nin calamidad kan nagtalikod na taon.


Maabot muna sa cincuentang familia an maeenot na benipisyaryo sa cincuentang ikokonstruhir na housing projects alagad target an sagcod 120 mga benipisyaryo.


Sa Calabanga, CSur an ceremonia ginibo aga kan Lunes, Hunyo 7 sa Barangay Sabang para sa treinte y siete (37) housing units para sa mga familia na nag-eestar sa coastal areas kan brgy.


An mga benipisyaryo si mga residentes na yaon sa delicadong lugar asin ipapamugtak sinda harayo sa peligro.


Digdi sa Camarines Sur an pinakaenot na BAHAYanihan initiative pigpunan sa Barangay Poblacion, Lupi sakop kan premir distrito para sa 140 familiang benipisyaro na nawaran nin estaran matapos kan sunod-sunod na bagyo kan nakaaging taon.


An mga housing units madali nang matapos nganing okuparon kan mga familiang nawaran estaran. (DPAureus)