2 jovenes na nakapurot nin P64k, orgulyo kan City Hall

Duwang jovenes sa Ciudad nin Naga, urgulyo ngunian kan City Hall sa pagiging honesto matapos mapurot an mga nahulog sa tinampo cuarta na nagcacantidad Php64,000 an naibalik tolos sa may kagsadiri sa paagi kan Naga City Police Office.

Sa tahaw kan pangangaipo kan cuarta ngunian na panahon nin pandemya dai nagduwa-duwa sinda Gerry Cardinas Jr. asin Lawrence Isaac na parejong residentes kan barangay Lerma asin mga ordinaryo sanang empleado sa pribadong companya na ibuelta tolos an cuarta sa tunay na maysadiri na sinda Maria Lourdes Romero asin Maria Cecilia Parada na iyo an nagkua kan cuarta sa Police Station matapos maprubaran kan investigador kan NCPO na iyo an tunay na kagsadiri.

Ini an mga pahayag sa Bicol Mail ni Consejal Vidal Castillo padreno kan resolution No. 2021-123 na nagtataong komendasyon sa duwang jovenes mantang lunad sa saindang motorsiklo naheling an mga nakawarak sa tinampong mga manangribo, matapos nindang matipon pig-turned over tolos sa jefatura kan pulis.

Nagpakua nin retrato hale sa wala sinda Lawrence Isaac asin Gerry Cardinas Jr. matapos marecibe an komendasyon sa City Hall kan saindang ibalik sa may sadiri an napurot na P64,000 sa tahaw si Consejal Vidal Castillo, katakid sa too si Ms. Maria Lourdes Romero (may sadiri kan nakuang cuarta). (James Den)

Sa estorya kan duwang jovenes kan hapon kan Febrero 22, 2021 sa brgy. Dayandang sa may kalabaan kan Misericordia St. mantang sinda nagpapadalagan kan motorsiklo naheling sa tinampo an mga nagkahurolog na tigmanangribong pesos asin matapos nindang matipon tolos pig-turnover sa NCPO.

Sinabi pa ni Castillo saiyang pigtawan duon na dapat matawan nin onra an duwang jovenes nganing pag-arogan kan iba na nakapurot kan bako ninda dapat ibalik sa kagsadiri.

Nin huli kaini sinda Cardinas asin Isaac bako lang orgulyo kan saindang familia envez kan Ciudad nin Naga.

An mosyon ni Castillo sa ginibong sesyon regular sa Sangguniang Panlungsod kan Marso 2, 2021 pigsegundaran ninda Consejales Joselito Del Rosario, Elmer Baldemoro asin Jessie Albeus.

Matapos kan flag raising ceremony sa City Hall kan Lunes, Marso 8 pinangenotan ni Alcalde Nelson Legacion, Bise Alcalde Nene de Asis, Consejal Castillo asin mga miembros kan SP an pagtao kan komendasyon na presente an may kagsadiri kan cuarta na si Ms. Romero taga Camaligan Camarines Sur.

Mientras tanto, kan nakaaging Febrero 19 nakapurot man nin sarong wallet na may laog nin P7,740 si Ape de Belen sa brgy. Bagumbayan Norte, Ciudad nin Naga na tolos man na-ibalik sa kagsadiring si SK Chairman John Rey Rivera.

An wallet pig-turn-over sa Brgy. Hall sa Bagumbayan Norte asin digdi na nakua kan may kagsadiri.

Si de Belen pigtawan man nin komendasyon kan City Hall sa paagi nin joint and collective motion kan miembros kan Sangguniang Panlungsod. (dpa)