Mga reg’l office sa Naga, CSur dapat dai na pakiaraman

February 16, 2017

 

Nagkapera pang natatada na mga oficina rehiyonal nin agencia de gobierno namumugtak pa sa Ciudad nin Naga asin Camarines Sur alagad nanindugan sinda Bise Presidente Leni Robredo asin Alcalde John Bongat kan Ciudad nin Naga dai na dapat ining pakiaraman nganing ihubo sa Ciudad nin Legaspi.

An bise presidente nagpahayag sa miembros kan media sa Ciudad nin Naga na pig-olayan ninda ni Alcalde Bongat an padikit-dikit naman na paghubo kan oficina rehiyonal sa Albay asin nakatalaan siyang magsurat nganing ulangan an mga lakdang na ini mientras na an kunsentrasyon kan mga
oficina sa Ciudad nin Legaspi dai nababagay sa direksyon kan gobierno puon pa kan 1986, na i-decentralized na dai dapat naka-kunsentrar sa sarong lugar an gabos na oficina.

Kun ini an mangyayari afectado man an pag-asenso kan ibang mga provincia mantang concentrado sana sa Ciudad nin Legaspi, dapat bako lang ngani ma-retener sa Naga envez matawan pagkakataon an ibang provincia.  

Dai palang nahahaloy an oficina rehiyonal kan NBI Bikol na namumugtak sa Ciudad nin Naga, biglang binalyo sa Legaspi na dai lamang nag-cortesia sa City Hall.

Pinaliwanag man ni NBI Director Tomas Enrile, an pagbalyo kan saindang oficina bilang pagsunod sa cuarenta años nang presidential proclamation ni diktador Ferdinand Marcos na an Legaspi iyo an Regional Center kan Bikol.

Sa entrevista kan BM sa jefe ejecutivo kan Naga, sinabi kaini na dapat imantenir na digdi an mga natatada pang mga oficina rehiyonal sa Naga asin Camarines Sur mantang dakul nganing mga oficina rehiyonal sa Legaspi an padagos pang nag-aarkila sa pribadong mga edificio.

  Napag-araman na treinta pang mga oficina rehiyonal sa Albay mayo man nin sadiring edificio envez nag-aarkila sa mamahalon na pribadong facilidades na nakawarak sa mga barangay sa Daraga asin Legaspi.

Inaalok kan alcalde an mga oficina rehiyonal sa Legaspi na mayo pang permanenteng lugar na bukas an Naga asin Camarines Sur na magbalyo digdi.

Kabale pa sa natatadang mga oficina rehiyonal sa Ciudad nin Naga asin Camarines Sur iyo an GSIS, SSS, Pag-Ibig Fund na an labi sa cincuenta por ciento kan miembros kaini gikan sa Camarines Sur asin Camarines Norte, Department of Agriculture na namumugtak sa setenta hektaryang lote sa Pili, Camarines Sur asin an provinciang ini iyo an tambubong nin paroy, Presidential Commission on Indigenous People sa Ciudad nin Iriga, National Irrigation Administration asin an Development Bank of the Philippines.

Afuera pa kaini, grabe an commercial activity sa Naga alagad kun gagaboson nalang sa sarong lugar bako man yan marhay, sabi pa ni Bongat.

Si dating Gobernador Joey Salceda kan Albay kan siya congresista pa kan tercer distrito nagpahayag nin pag-pabor na dapat ibalyo an regional center sa Ciudad nin Naga hale sa Ciudad nin Legaspi sa dahilan na an Legaspi parating sinasanop nin tubig baha asin afectado pa kun nagtutoga an Volcan Mayon.

An bagay na ini saiyang pig-anunciar sa Camarines Sur kan siya maging juespe de honor sa ginibong commencement exercise sa University of Nueva Caceres kan 2006.

Sinabi pa na an regional center parating binabaha, afuera pa kaini kun nagkakaigwa nin mayor na pagtuga an volcan natatalbongan nin lahar an mga tinampo mala ngani enterong afectado si  ibang mga nadestrosong oficina gulping documentos kaidto an nagkaturonaw.




 

Share on Facebook
Share on Twitter
Please reload