MNWD nagcocontra sa mini-hydro sa Mt. Isarog

February 23, 2017

 

An Metropolitan Naga Water District (MNWD) na saro sa mga programa kaini na maprotehiran an Mount Isarog Natural Park (MINP), pusog an panindugan contra sa pagconstruhir nin Mini Hydro Power Plant huli ta ciertong ma-aafectaran an watershed  sa Camarines Sur asin nakatalaan nindang ipadara an position paper ki DENR Secretary Regina Pas Lao-Lopez.

Si Jorge Palma, Board Chairman kan MNWD nagpahayag na sararo sinda sa junta sa panindugan contra sa proyecto mientras na naglilibot na an saindang position paper sa isyu sa Rangas River Mini Hydro Power Project na pigpipirmahan na kan stakeholders asin iba pang mga ahencias na kasurog kan water district na mapangatamanan an bukid Isarog.

Sa position paper, sinabi na an proyectong mawot mangyari kan Clean and Green Energy Solutions Inc. na magconstruhir kan Mini Hydro Electric Dam sa San Pedro, Goa, Camarines Sur langtadan na pagsinutil sa probisyon kan Republic Act No. 7586 o National Integrated Protected Areas Sysyem (NIPAS) Act of 1992.

Saindang pigbiklad an minasunod na isyu; 1. Nagpaso na an Environmental Compliance Certificate (ECC) kan nakaagi pang Noviembre 11, 2014 na pig-isyu kan DENR kan Noviembre 11, 2009, 2. An proyecto na yaon sa laog kan protected area na envuelto an pagconstruhir nin tinampo asin maputol nin 77 mga kahoy na prohibido ini base sa NIPAS Act. 3. An pag-gamit nin motorized equipment sa laog kan protected area kinakaipuhan magkua nin permiso sa Protected Area Management Bureau (PAMB), 4. Ano man na estraktura nakalaog na sa Strict Protection Zone kan MINP, asin 5. Pagbalga sa Rule 16.1 & 164 of the NIPAS and Implementing Rules and Regulations.

Hinahagad ninda ki Secretary Lopez magconducir nin pag-evaluar sa aplikasyon para sa bagong ECC kan Clean and Green Solutions Inc. asin repasohon an lugar kan development plan, particularmente sa estractura asin dai tugotan an pagpurotol nin kakahoyan asin iba pang actividades kan proyecto na makaka-afecto sa kapalibotan kan MINP.

  Nagtutubod an pamayo kan junta na ma-aksyon digdi an DENR sa tahaw kan mainit na isyu ngonian sa mga pagmimina sa nacion na dakulang destroso sa kapalibotan.

An Bukid Isarog may kahiwasan nin diez mil hektarya mientras na an 700 hektarya kaini iyo an watershed area kan MNWD na namumugtak sa Barangay Curry, Pili, Camarines Sur asin Brgy. Panincuason, Ciudad nin Naga. Kabale sa nakakasakop na mga banwaan kan bukid iyo an Ocampo, Tigaon, Goa, Calabanga asin Tinambac.

Afuera  kan mga pumping station kan MNWD igwa pa sindang nakukuanan nin burabod kan tubig gikan sa Rumangrap spring na igwa na sanang capacidad na 64 litros na pigluluwas na tubig cada segundo (LPS),  Anayan Spring – 17 LPS, Kalinisan – 3 LPS, asin Asupre – 7 LPS, gabos ini yaon sa Bukid Isarog asin ciertong bababa an nakukuang tubig digdi kun maging operational an sinambit na mini-hyrdo.

Sa entrevista kan BM ki Francis Badiong, Project Area Manager kan Clean and Green Energy Solutions, Inc., sinabi kaini na dai man ma-aafectaran an potable water sa bukid mientras na dai man ngani puede mainum an tubig gikan sa Rangas River huli ta 60 por ciento kaini igwang halong asupre.

Sinabi pa na parte kan Rangas River gagamiton an running water sa propuestong planta nganing magproducir nin energia na babakalon kan Casureco IV asin igwa na sindang purchase power agreement.

An Ateneo de Naga University Institute for Environmental Conservation and Research (INECAR), nagpahayag nin pagcontra sa proyecto huli ta ciertong dakulang efecto ini sa kapalibotan.                                                                                                                                                            (DPA)



 

Share on Facebook
Share on Twitter
Please reload