Siyam na brgy delicado sa tubig baybay, gapo hale sa Mt. Iriga

Ciudad nin Iriga - Idinulok na kan lokal na gobierno kan ciudad na ini sa Regional Development Council (RDC) an presenteng problema kan Mt. Iriga na nagdadara nin peligro sa siyam na Barangay na harani sa bukid orog na kun nagkakaigwa nin makusog na bagyo asin sigidong pag–uuran. Sinabi ni Alcalde Madelaine Y. Alfelor, dai kaya kan LGU Iriga an fondong gagamiton para sa pagconstruir nin mga istruktura arog kan small water impounding system na masuway asin mapugol kan pagruso kan tubig baybay asin gapo hale sa bukid pasiring sa mga barangay na yaon sa pamitisan kaini. Kabale sa mga afectado iyo an mga barangay kan Perpetual Help, Sto Domingo, Sta, Teresita, Santiago, Sta. Elena, San Juan, San Nicolas, San Isidro asin San Vicente Norte. An RDC Bikol na pinamamayohan ni Albay Governor Al Francis Bichara an makakatabang nganing mahanapan nin dakulang fondo asin marealisar an proyecto sa Mt. Iriga. Sa lado kan Department of Public Works and Highways, 4th Engineering District, maconducir sinda nin panibagong inspeksyon para madeterminaran kun igwa sindang mga istrukturang nadanyaran o namimiligrong dara kan pag uuran o raot nin panahon. Makikipag coordinar man sinda sa lokal na gobierno kan ciudad para maaraman kun anong disenyo kan istrukturang na kaipuhan para sa nasabing bukid. Sa paglamasa kan nakaaging bagyong ‘Nina’, nagkaigwa nin mga flashflood asin paghuros nin daga na afectado an duwang sona sa Barangay Sta.Teresita, sarong sona sa Barangay Sta.Elena asin apat na sona sa Barangay Perpetual Help asin anom pang Barangay na nakapalibot sa bukid. Dai na nagagamit an mga drainage canal mientras na nagkatarahoban nin baybay asin gapo mala ngani an barangay road kan Perpetual Help iyo na an inaagihan tubig baybay asin gapo asin iba pang barangay. Sinabi ni Punong Barangay Eduardo Dimaiwat, kan Barangay Perpetual Help na natahoban nin Baybay asin gapo an drainage canal sa saindang barangay kun kaya kaipuhan maggamit nin heavy equipment para mahale ini. Nagkakaigwa man nin food for work an barangay para mapadali an paglinig kan mga baradong kanal. Kinumpirmar pa kan Punong Barangay, na may mga naghahale na sa saindang lugar asin ipinapabakal an saindang lote sa hababang presyo huli kan peligro na dara kun nagkakaigwa nin pag uuran asin calamidad. Kasumpay kaini, kinumpirmar kan Community Environment and Natural Resources na nakakasakop sa ciudad, na an pagputol nin kahoy asin pagtanum sa Mt. Iriga an saro sa mga rason kan pagka kalbo kan bukid asin pag lumoy kan daga kun haloy an mga pagbulos uran. An Mt. Iriga o inaapod man na Mt. Asog an kino-considerar na Strato Volcano, an lava kaini an madaling magtagas huli kan pagiging mapulot. Sa Pilipinas an ibang kapareho kan Mt. Iriga iyo ang Mt. Labo sa Camarines Norte, Mt. Isarog sa Camarines Sur, Mt. Mayon sa Albay asin an Mt. Pinatubo. Nairehistro man an pag putok kan Mt. Iriga kan taon 1628 asin 1642. (Melvin Machado)