Mga votante sinusoyo na kan Comelec sa barangay

March 2, 2017

 

Kun dai pa suyoon kan Commission an Elections an mga  barangay sa saindang ginigibong satellite registration padagos na magiging hababa an por cientaje kan nagpapalista sa Comelec nganing makaparticipar sa sarabay na pirilian kan Barangay asin SK sa Octubre 23, 2017.

Sa Ciudad nin Naga, sinabi ni Election Officer Maico Julia Jr. na sampulo na sa viente sieteng barangay kan ciudad an sainda nang nalibot sa paagi kan satellite registration puon kan Febrero 3 hasta Febrero 25, 2017 na halangkaw an numero kan mga nagpapalista kun itatampad sa mga nagpapalista sa saindang oficina.

Sa datus kan Comelec Naga sa mga nagpalista sa SK voters igwa pa sanang 195, regular voters - 1,115, PWD’S – 13,  Senior Citizens – 88, na igwa nang total na 1,411 hasta kan Febrero 25.

Puon kan Noviembre 7, 2016 kan bukasan kan Comelec an continuing registration inaabot sana nin treinta hasta cincuenta an nagpapa-rehistro aroaldaw, alagad kun sa satellite registration nagsasakat sa 62 hasta 165 an nagpapalista, sabi ni Julia.

  Inagihan na kan saindang satellite registration iyo an mga barangay kan Lerma, Caluag, Santa Cruz, Bagumbayan Norte, Concepcion Pequenqa, Peñafrancia, Concepcion Grande, Balatas, Abella, Concepcion Pequeña, High School asin Igualdad.

Sa mga SK voters kun sa oficina kan Comelec bibihira an nagpipila alagad kun igwa naabot sana sa saro hasta sa apat na jovenes.

Sinabi ni Julia, an pagpalista abot sana sa Abril 29, 2017 mantang magpapadagos pa an saindang satellite registration nganing maubos an viente seite barangay kan ciudad, alagad nag-aapelo an Comelec  sa mga votantes na dai na maghalat nin ultimo diya nganing dai na tikapohan sa panahon.

   An saindang actividades sa ngonian iyo an pag-andam kan pirilian sa Barangay asin Sangguniang Kabataan na pigtalaan kan commission sa Octubre 23, 2017. An pirilian enot nang pigtalaan kan Octubre 30, 2016 alagad pig-uktaba kan congreso ngonian na taon.

Nagdududa an ibang kapitanes de barangay na posibleng i-uktaba naman an pirilian sa masunod na taon mientras na pigtatawan nin prioridad kan administrasyon ni Presidente Rodrigo Duterte iyo an pigtutulodad na federalismo, alagad mayo paman nin kumpirmasyon kaini an Comelec.    (DPA)


 

Share on Facebook
Share on Twitter
Please reload