Bikol PNP andam na sa liwat na guerra vs droga

March 9, 2017

 

An Camp General Simeon A. Ola kan Bikol PNP preparado na sa pagbuhay kan campaña  contra sa droga kasunod kan pinaluwas na directiva ni PNP Chief Director General Ronald ‘Bato’ Dela Rosa na ipapadagos ninda an mga operasyon laban sa droga sa paagi kan ‘’Oplan Double Barrel Reloaded.’’

Si P/Chief Supt. Melvin Ramon G. Buenafe, regional director kan Bikol PNP nagpahayag na kan saindang kaandaman sa directiva kan national headquarter, alagad nagcierto na mayong makakahalong ‘lapang kamatis’ sa bibilogon na Drug Enforcement Unit nganing maseguro na mayong mangyayaring problema asin reklamo contra sa PNP.

Kan suspendiron an guerra contra droga, digdi sa Bikol dakul na mga oficiales de barangay, LGUs asin iba pang mga sektor an nagpapadara nin mensaje na dapat ipadagos an operasyon contra droga mientras na nagbabalik naman an mga envuelto sa ilegal na actividad, sabi pa ni Buenafe.

Bako lang digdi sa satong rehiyon envez sa nacional maging an Kampo krame nakakarecibe nin mga kahagadan na dapat ipadagos an higot na campaña sa droga, huli

kaini nag-desisyon an jefe kan PNP na ipadagos an guerra alagad pig-ngararan na ‘’Oplan Double Barrel, Reloaded.’

Hinagad kan Bikol PNP sa namamanuan na magtabang sinda asin magparticipar sa espuersos kan gobierno nganing magkasararo na maging efektivo an operasyon kan PNP, PDEA, asin AFP mantang dai marerealisar an campaña sa droga kun kulang suporta.

An Bikol PNP sa liderato ni Buenafe naheling kan publico an marhay na resulta sa guerra contra droga mala ngani pakatapos kan taon 2016 sa estrictong campaña sa ilegal na actividad nakarecibe nin onra gikan sa national headquarter bilang numero uno sa nacion sa Oplan Double Barrel Alpha.  An saindang acomplisimiento bako lang 100 per cent  envez nagsakat sa 216 per cent.

Afuera pa kaini, naka-organisar na nin mga Kasurog Kontra Droga-Bicol Region Against Drugs (KKD-BRAD) sa mga provincia kan Kabikolan na dakulang bagay na igwang grupo na nagsusuporta sa PNP sa campaña contra droga.

Kasabay kaini, nagcoconducir pa nin mga medical dental mission, feeding asin libreng gupit katuwang an mga PCRU, PPO asin LGUs na kabale sa pinakahuring ginibo an programa sa Calabanga asin Goa, digdi sa  Camarines Sur.                           (DPA)                                                  




 

Share on Facebook
Share on Twitter
Please reload