Casureco II mapaapod referendum: Pagpipilian kun maparehistro sa CDA, SEC, NEA

March 9, 2017

 

Isusunad na sa referendum kan Camarines Sur II Electric Cooperative (Casureco II)  sa miembros-consumedores nganing mag-desisyon na kun saen mawot nindang irehistro  an    cooperativa na pagpipilian an minasunod, Cooperative Development Authority (CDA), Security and Exchange Commission (SEC), o dapat magpadagos sa presenteng manijamiento sa lindong kan National Electrification Administration (NEA).

Si Rolando Pante, Institutional Service Department (ISD) Manager asin parataram kan Casureco II nagpahayag sa Bicol Mail na sainda nang pigtalaan an referendum sa isasabay sa gigibohon na Annual General Membership Assembly (AGMA) sa Octubre 2017 nganing makua na an desisyon kan consumedores.

An actividad kan manijamiento kasunod kan
directiva ni NEA Administrator Edgardo R. Masongsong na dapat antes kan Enero 2018  magconducir na nin referemdun sa kaparejong mga kahapotan an gabos na cooperativa nin electricidad sa nacion.

An Casureco II Consumers Group na pinamamayohan ni Consejal Miles Raquid-Arroyo, perang taon na an nakakaagi hinagad na sa manijamiento na magpaapod nin referendum nganing hapoton an rinibong consumedores kun pabor o contra sa conversion kan Casureco II sa stock cooperative o magpa- rehistro sa CDA alagad ngonian sana sa bagong pamayo kan NEA nagpaluwas nin memorandum.

Kun an sarong cooperativa nin electricidad rehistro sa CDA asin kun magdeclara an manijamiento na igwang ingreso an miembros makakarecibe nin dividendo  alagad kun lugi mayong makukua. An matukaw na director dapat elihido kan miembros asin an nabilog na junta iyo an manombra kan general manager.  

Kun maparehistro sa SEC dai paman pigdetalye kan cooperativa asin sa presenting pagpadalagan padagos na inaapod na cooperativa nin electricidad alagad dai man rehistro sa CDA.

 Digdi sa rehiyon cinco na igwang onceng cooperativa nin electricidad solamente an Sorsogon II Electric Coopperative an rehistro sa CDA bilang stock cooperative.

Dinagdag pa kan Casureco II na nagtalaan sinda nin district elections sa Agusto 26, 2917 sa mga banwaan kan Magarao, Bombon, Naga South asin Naga North. Sa presente igwa nang elehidong mga director sa banwaan kan Calabanga, Tinambac-Siruma, Milaor asin Pili.

Alagad kun liwat magpalyar an pigtalaan na district elections an NEA manombra nin mga director sa mga vacanteng distrito mantang an saindang kualipikasyon dapat masunod si dating reglamento sa nagcacandidatong director.                                                                         (DPA)                                                                                                                             






 

Share on Facebook
Share on Twitter
Please reload