MATAPOS AN DOCENG TAON: Capitolyo Provincial nakapili na nin permanenteng PD

March 9, 2017

 

Inabot nin doceng taon an gobierno provincial kan Camarines Sur nganing makapili nin permanteng provincial director kan PNP Provincial Office sa presenteng administrasyon na ni Gobernador Migz Villafuerte na yaon na sa ika-duwang termino.

Nasa  high morale ngonian an Capitolyo Provincial asin nagcierto nin sinto por cientong suporta an jefe ejecutivo kan provincia sa bagong PD na si Sr. Supt. Jerry Bearis.

Kan huring termino kan saiyang lolo na si Gobernador kaidto Luis Villafuerte asin sundo na natapos an siyam na taon ni dating Gobernador asin ngonian Congresista LRay Villafuerte kan segundo distrito, na ama kan joven na gobernador anas OIC asin Acting Provincial Director na ngonian sana nakapili an Capitolyo Provincial nin permanteng provincial director.

Sinabi kan gobernador napili niya si Bearis huli kan saiyang naheling na kakayahan na sa laog sana nin pitong bulan komo Provincial Director kan Masbate napili bilang Best Provincial Director asin halangkaw pa si acomplisimiento sa campaña laban sa ilegal na droga asin iba pang kriminalidad.

Afuera kaini, naging jefe de pulicia sa Ciudad nin Iriga asin anom pang mga banwaan digdi sa Camarines Sur. Sarong Bikolano na tubong Nabua,  aram niya an geograpiya asin cultura kan provincia, sabi pa ni Villafuerte.

Base sa Local Government Code an jefe ejecutivo kan provincia iyo an may poder na magpili kan permanteng pamayo kan PNP gikan sa limang nominado kan PNP Regional Office na narealisar  sa administrasyon kan presenteng gobernador.

Si Bearis, nag-asumir sa puesto sa ginibong simpleng ceremonia kan Marso dos sa PNP Provincial Office, Concepcion Grande, Ciudad nin Naga na pinangenotan ni Regional Director Chief Supt. Melvin Ramon  Buenafe asin sa precencia kan joven na gobernador.

Saiyang pigribayan si dating Acting Provincial Director Sr. Supt. Walfredo Pornillos na saro man Bikolano asin taga Nabua, CamSur asin destino na ngonian sa Camp Simeon Ola, Ciudad nin Legaspi.                                                                                                                                (DPA)





 

Share on Facebook
Share on Twitter
Please reload