SA CASURECO II: MSEAC vs kombersiyon kan Casureco II sa CDA

March 16, 2017

 

An Multi-Sectoral Electrification Advisory Council (MSEAC) kan Camarines Sur II Electric Cooperative (Casureco II) mas pinapaboran an presenting kamugtakan kan cooperativa sa irarum kan superbisyon kan National Electrification Administration (NEA) huli ta nakakabentaje man giraray na mantenido digdi an proteksyon sa lado kan miembros-consumedores asin manijamiento.

Si Irsam Flores, MSEAC Federation President nagpahayag sa entrevista kan Bicol Mail na sa saindang inicial na orolay naheheling na mas magiging paborable sa duwang lado kun itatampad na mag-parehistro sa Cooperative Development Authority o sa Security and Exchange Commission.

Kun  sa CDA maparehistro an Casureco II, ini magiging stock cooperative asin saro nang profit oriented an manijamiento mantang paborable sana ini sa darakulang consumedores o negociantes huli ta sinda iyo an igwang kakayahan na magtaya nin dakulang cantidad sa capital sharing alagad mayong kakayahan an ordinaryong consumedores, sabi pa ni Flores.

An Casureco II nagtalaan nin referendum sa maabot na Octubre 2017 na isasabay sa Annual General Membership Assembly (AGMA) nganing dagos nang isusunad an tolong pagpipilian kan miembros-consumedores kun sain sinda mapabor;  enot kun sa presenting kamugtakan kan cooperativa na nasa lindong kan NEA, ika-duwa - kun maparehistro sa CDA nganing maging stock cooperative asin ika-tolo sa SEC na pueding padalaganon nin darakulang corporasyon.

Saindang pig-ehemplo an ibang cooperativa nin electricidad na nagpa-converter sa CDA, si paglaom kan miembros-consumedores na magkakaigwa sinda nin divedindo mientras na sinda saro nang stock cooperative, alagad negativo mantang parating nalulugi.

Kabale pa sa desbentaje an mga darakulang consumedores na igwang dakulang capital sharing iyo an ma-ambisyon na magcandidatong director mientras na kaipuhan maprotehiran ninda an pigtayang milyon pesos na capital.

Kun padagos na mamantenir sa irarum kan NEA kun igwang calamidad an cooperativa madaling nakaka-aprovetsar nin calamity loan sa hababang por ciento alagad kun sa CDA dawa obligado pa an NEA na magreparo sa manijamiento kaipuhan mag-utang sa bangko na mas halangkaw an por ciento, sabi pa.  

An MSEAC, matabang sa consumedores nganing saindang ipaliwanag an mga bentaje asin disbentaje sa tolong mga isyu na isusunad sa referendum.

An NEA nagpaluwas nang memorandum sa gabos na cooperativa nin electricidad na dapat mag-apod nin referendum antes kan Enero 2018.                                                 (DPA)

 

Share on Facebook
Share on Twitter
Please reload