Tripartite MOA maninigo sa pagpahale kan manga ulang na poste sa tinampo

March 16, 2017

 

Nagkaperang mga tinampo sa Ciudad nin Naga na sakop kan national road naghiwas na matapos kan road widening project na pig-implementar kan Department of Public Works and Highways (DPWH) alagad dakul pang ulang na mga poste kan Camarines Sur II Electric Cooperative (Casureco II) na delicado sa aksidente sa trafico.

Sa Sangguniang Panlungsod, si Consejal Joselito Del Rosario pamayo kan Committee on Public Safety sa saiyang privilege speech sa sesyon regular kan Martes, Marso 14 saiyang tinawan duon an mga ulang na estractura sa mga tinampo na kaipuhan mahale sa paagi nin pagkaigwa nin Tripartite Memorandum of Agreement entre kan 2nd Engineering District kan DPWH, Casureco II asin City Hall para sa pampublicong seguridad.

Saiyang sinabi na an RA No. 10531 o mas midmid sa National Electrification Administration Reform Act of 2013 na naging ley kan Junio 1, 2013 asin an implementing rules and regulations (IRR) nag-efecto kan Agusto 13, 2013.

Susog sa IRR an Department of Energy asin DPWH sa laog nin 180 diyas puon na mag-efecto ini, dapat mag-isyu nin IRR nganing ipasunod an maninigong kompensasyon sa mga cooperativa nin electricidad.

Alagad pakalipas nin haros tolong taon na mayo pa nin joint issuance an DOE asin DPWH. Si dating DOE Secretary Carlos Jericho Petilla kan Junio 26, 2015 nagpaluwas nin circular bilang  ‘Interim Uniform Guidelines and Procedures for the Recovery of Just Compensation for Relocation’, sabi pa kan consejal.

‘Sinabi po sa sinambit na guidelines na in the determination of relocations costs, the ECs and the proponent of the government or non-government project is encouraged to come up with a collectively agreed valuation, taking into consideration the aggregated benefits of the project to the community’, sabi pa sa privilege speech.

Piglinaw kan consejal na sa lado kan Casureco II asin DPWH naglaog na kuta  sa sarong MOA nganing resolberan an situasyon sa Pili-Diversion Road, na kun saen an mag-ibong na lado nagkasundo nganing iimplementar an paghubo kan mga poste sa mag-ibong na abaga kan tinampo alagad an DPWH Legal Service sa central office dai nag-uyon envez an saindang posisyon na an RA 10531 o NEA Law bakong maninigong basehan nganing itao an kompensasyon.

Digdi sa Naga, base sa initial assessment kan City Engineers Office. Igwa pang 180 mga poste an nawalat sa mga pinahiwas na tinampo.

Huli kaini, pigtutulod ni Del Rosario an saiyang propuesto na ‘Resolution granting authority to his honor, the City Mayor to enter into a Tripartite Memorandum of Agreement with the DPWH 2nd Engineering District and Casureco II to address the urgent public safety concerns brought about by road widening in some roads in Naga City.

An propuestong resolucion nakasunad na sa public safety committee.

                                    (DPA)




 

Share on Facebook
Share on Twitter
Please reload