Parasira laban sa ilegal na parasira

March 23, 2017

 

Tinambac, Camarines Sur. An Samahan ng mga Mamamayan sa Caloco (SAMACA) sa Barangay Caloco sa banwaan na ini magiging activo na sa campaña contra sa ilegal na parasira sa Lawit Bay matapos marecibe na ninda an ayudang fondo na ibabakal nin mga motor engines sa baroto gikan sa Angat Buhay Livelihood Assistance ni Bise Presidente Leni Robredo.

Bako lang gagamiton sa pagsira para sa saindang hanap buhay sa kadagatan kan Tinambac an treintang (30) units nin mga makina sa baroto envez magiging activo sinda bilang mga volunteer sa Bantay Dagat.

Ini an mga pahayag sa Bicol Mail ni Punong Barangay Levi Terrobias kan Brgy Caloco matapos saindang marecibe an asistencia finansiyal gikan  ki Bise Presidente Robredo sa ginibong simpleng ceremonya sa municipio kan Juevez, Marso 16, 2017 na inatendiran kan mga oficiales lokal sa pamamayo ni Alcalde Ruel Tuy.

Doble an saindang katuyohan mientras na envuelto sinda sa hanap buhay sa pagsira magagamit ninda an baroto sa pag-patrolia bilang Bantay Dagat, sabi pa kan Punong Barangay.

An saindang barangay igwang 1,600 na populasyon na kadakle kan familia nabubuhay sa paghanap sira sa dagat asin an iba sa pag-oma.

Afuera sa Brgy. Caloco, an Barangay Daligan asin Bani  sa  kaparejong banwaan nakarecibe man nin mga fishing paraphernalia  para sa saindang livelihood project.

An tolong barangay sa Tinambac, sakop kan cuarto distrito kan Camarines Sur iyo an enot na hornada kan cincuentang (50) mga banwaan sa Filipinas na benepisyaryo kan Angat Buhay Program kan Oficina kan Bise Presidente asin katuwang niya digdi iyo an RAF International Forwarding.

Ipinahayag  pa na pigserne na an mga benepisyaryo base sa saindang  pangangaipo asin kahagadan kan oficiales lokal na papangatamanan asin mapakinabangan an tabang na tinao sa sainda.                             (DPA)


 

Share on Facebook
Share on Twitter
Please reload