PATANID KAN RDO 65: Oplan kandado vs mga madayang negociante

‘Magdeclara sana nin tama kisiera harani sa katotoanan’. An Revenue District Office (RDO) No. 65 kan Bureau of Internal Revenue (BIR) sa Ciudad nin Naga nagpatanid sa mga nagdadaya asin nagdudolag na magbayad nin buwis na tatamaan sinda kan Oplan Kandado asin mabayad pa nin multa. Dai sinda makakadulag kan obligasyon sa gobierno huli ta maheheling man sana sa data base kan ahencia, sabi kan BIR sa Ciudad nin Naga. Si Socorro Ramos Lafuente, jefe kan RDO 65 nagpahayag sa entretvista kan Bicol Mail na gabos na parabayad nin buwis candidato sa Oplan Kandado alagad kun maprobaran sa saindang pagsiasat na igwang under declaration nin sobra sa treinta (30) por ciento asin habo talagang magpa-rehistro, puede sindang maging candidato na kadakle yaon sa laog kan ciudad. Antes iimplementar an Oplan Kandado naagi sa proceso na pinapadarahan nin 48 hours notice na dapat simbagon sa paagi nin surat na notaryado nin abogado alagad kun dai ibabasura kan RDO. Igwa pa sindang dugang na limang aldaw na puedeng simbagon kun tano ta dai sinda dapat castigohon sa paagi kan Oplan Kandato asin kun yaon na an mga documentos, an komite na pigbilog kan BIR magkakaigwa nin miting nganing tukaron kun dapat lang castigohon an nagdadayang negociante. An saindang oficina central nagpaluwas nang kasugoan sa mga RDOs na dapat iimplementar an oplan nganing castigohon si mga nagdadaya asin paradulag na magbayad kan saindang obligasyon mientras prioridad kan saindang bagong commissioner mapalangkaw an koleksyon sa buwis. P3.2 BILYON TARGET NA MAKOKOLEKTA KAN RDO 65 Sinabi pa ni Lafuente na ngonian na 2017 pinapasan ninda an P3.2 B na target goal na makakatabang digdi iyo an ilalansar na mga Oplan Kandato, alagad dawa mayo kan oplan kun mag-cocooperar an mga parabayad buwis kakayahon kan RDO 65 na makua an halangkaw na koleksyon. ‘Talagang mahirap an P3.2-B’, alagad kun voluntad na mabayad an mga parabayad nin buwis dawa dai kan oplan, bencmarking asin iba pang campaña sa tax collection dakulang bagay sa sainda, sabi pa. Ipinahayag pa na magdeclara sana nin tama kisiera harani sa katotoanan, hagad kan ahencia sa tax payers sa Naga asin sa viente uno pang mga banwaan sa premir, segundo asin tercer distrito kan Camarines Sur na sakop kan RDO 65. CUEING SYSTEM, ENOT SA RDO 65 Saro sa pig-oorgulyo digdi iyo an cueing system na saindang pigpunan kan 2013 sa transaksyon sa oficina na pig-adaptar kan national level asin ginigibo na kan mga RDOs. Si Lafuente na buelta sa RDO 65 kan Septiembre 1, 2016 matapos idestino siya sa ibang provincia. Kan mag-asumir siya sa puesto sa Naga kan taon 2013, an RDO 65 iyo an top 1 sa target goal sa Rehiyon Bikol asin sa national level naging top 2 sa Class C, na nagrecibe siya nin mga onra. Mientras tanto, sa maabot na Lunes, Marso 27 saindang ilalansar an 2017 Tax Campaign Kick Off na may temang ‘Kabahagi kami sa Tunay na Pagbabago’. An programa pupunan sa paagi nin motorcade sa mga mayor na calye kan centro kan ciudad na paparticiparan kan mga empleados kan BIR, parabayad nin buwis gikan sa pribado asin pampublikong sektor, nagtalaan nin Tax Forum asin Signing of Pledge of Support na gigibohon sa Avenue Plaza Hotel. (DPA)