Pag-enmienda kan Juvenile Justice and Welfare Act, isinisikwal kan SP

March 30, 2017

 

Isinisikwal kan lokal na gobierno kan Ciudad nin Naga an propuestong ley sa Camara-Baja na ihuros an minimo na edad kan criminal responsibility hale sa quince (15) años pasiring sa nueve (9) años.

Sa sesyon regular kan Sangguniang Panlungsod kan Martes, Marso 28 inaprobaran an sarong resolucion na pusog nindang kinokontra an pagpasar kan House Bill No. 002, ‘An Act amending Republic Act 9344, as amended by RA 10630, reverting the minimum age of criminal responsibility from fifteen years to nine years’.

Sa ngonian pendiente na sa Camara-Baja an HB 002 na  mawot   ma-enmiendahan an RA 9344 o an ‘Juvenile Justice and Welfare Act of 2016’ na-enmiendado na kan RA 10630.

Si Consejal Elmer Baldemoro, pamayo kan Committee on Children kan SP iyo an padreno kan resolucion na sinuportaran kan mayoriang miembros kan saindang consejo afuera ki Consejal Salvador Del Castillo.   

Pinaliwanag ni Del Castillo an saiyang dai pag-uyon sa resolucion huli ta kun itatampad kan mga nakaaging viente cinco taon iba na an ugali kan mga menor de edad sa ngonian na ginagamit na sa manlaen-laen na kriminalidad mala ngani nagiging envuelto pa sa mga casong pang-gagadan.

Dai palang nahahaloy an Naga City Council for the Welfare and Protection of Children (NCCWPC)  na pinamamayohan ni Alcalde John Bongat nagpasar nin resolucion  na nagpapahayag kan saindang panindugan contra sa pag-enmienda kan RA 9344.  

Antes inaprobaran an sinambit na resolucion, si Baldemoro nag-gamit muna kan privileged hour sa sesyon regular na saiyang pigpaliwanag an negativong efecto sa menor de edad kun maaprobaran an HB 002 na pinapadrenohan ni House Speaker Pantaleon Alvarez asin nagkapera pang congresista sa Camara-Baja.      

Sinabi pa kan Consejal na parejo an saindang panindugan kan NCCWPC, mientras  na an Filipinas padagos na nagsusuporta sa Philippine Government’s International Commitment sa United Nations Convention on the Rights of Child (UNCRC), na mandato na maprotehiran an deretso asin kapakanan kan kaakian dapat lang irespeto an bagay na ini.

Sarong pagbalga sa probisyones kan UNCRC an propuestong bill. Pinapagirumdom ninda na an estado dapat irespeto, protehiran an mga kapakanan asin deretso kan mga kaakian base sa pinapasunod na prinsipiyo kan UNCRC, sabi pa.                                                                                               (DPA)                                                                                                                               





 

Share on Facebook
Share on Twitter
Please reload