Peace talks kan GRP, NDFP dapat ipadagos

March 30, 2017

 

Pili, Camarines Sur – An Sangguniang Panlalawigan kan Camarines Sur nag susuporta na ipadagos kan Government Republic of the Philippines (GRP) asin kan National Democratic Front Panel (NDFP) an orolay pang katuninongan matapos  bawion ini kan mag-ibong na lado  kan enot na semana kan Febrero 2017.

Sa pinasar na resolucion

na padreno si Vokal Jeorge  Benguia, ex-officio member kan SP na nagrerepresentar kan PCL saindang sinusuportaran an House Resolution 769 na naghuhurot ki Presidente Rodrigo Duterte na ipadagos an peace talk para sa karahayan kan namamanuan Filipino.

Sa ngonian liwat naman pighahace kan administrasyon Duterte na ipadagos an orolay pang katuninongan alagad nakatalaan munang ikunsolta sa national security advisers, militar asin sa PNP na mawot man mangyari kan gobierno provincial kan Camarines Sur na marealisar man giraray.

An Communist Party of the Philippines (CPP) nag-anunciar na nakatalaan sindang magdeclarang unilateral ceasefire antes kan Marso 31.

Si Benguia, komo pamayo kan PCL aram an kamugtakan kan mga barangay na kun igwang nangyayaring encuentro an soldados kan gobierno asin New People’s Army nakakadamay an mga inocenteng sibilyan.

Kabale digdi na nasasahotan kan militar an ibang residentes kan barangay na nagsusuporta sa rebeldeng grupo  sagcod na inaarestar sa akusasyon na aktibong miembro kan CPP/NPA.

Matapos ideclara ni Presidente Duterte kan nakaaging Febrero 4 na saiya nang ibinabasura an peace talks entre kan GRP asin NDFP, alagad an revolutionary movement bukas pa nganing ipadagos. Kabale sa dahilan na nagkaigwa nin marhay na resulta an ika-tolong hornadang orolay sa Roma, Italia kan Enero 26 na nagkaperang mga isyu an nahaman sa kasundoan.

Kasunod kan nangyaring pagpalyar kan peace talks digdi  sa  Bikol nagkaperang ralaban kan militar asin NPA an nangyari sa Camarines Sur asin Sorsogon.

Nagtutubod an SP na marerealisar  man  giraray na ipadagos an negosasyon sa orolay pang katuninongan.                                                                 

An saro sa isyu kan NDFP,  sinabi ni Ka Oris parataram kan NPA na an saindang liderato sa revolutionary movement padagos na naninindugan na palibrehon na an gabos na mga prisonero political.                                                                 (DPA)



 

Share on Facebook
Share on Twitter
Please reload