Doceng taon nang ordinansa pinaturog sa kawaran fondo



Pigmamando kan sarong ordinansa sa Sangguniang Panlungsod kan Ciudad nin Naga an house numbering alagad doceng taon na an nakaagi dai na-iimplementar kan jefe ejecutivo huli ta dai pigtatagamahan nin fondo. Ini an pigbuyagyag ni Consejal Salvador Del Castillo sa saiyang privileged speech sa sesyon regular kan SP kan Marso 28 asin saiyang hinahagad sa pag-iriba sa consejo dapat tagamahan nin P5 milyon para sa masunod na 2018 annual budget. An ordinanansa numerado 2005-08 nagmamando para sa house numbering sa gabos na mga residencia sa viente sieteng barangay kan ciudad asin kaipuhan an P14 milyon na prosupuesto, inabot na nin doceng taon ngonian na 2017 dai pa natatagamahan nin fondo, alagad pigrecomendar kan consejal na dawa P5 milyon tawan nin prioridad sa masunod na annual budget. Dakulang bagay an ordinansa na makakatabang sa ano man na pag-responde kun igwang emerhencia arog kan paglamasa kan bagyo ta madaling mahanap an harong maging sa mga insidente nin kasulo sa barangay. An sangguniang bilang nagrereparo kun na-iimplementar an pinasar na mga ordinansa, kaipuhan nang marealisar ini sa masunod na taon mientras na igwa man sanang pueding kuanan nin fondo an City Hall, sabi pa kan consejal. Afuera kan sinambit na ordinansa kun rerepasohon an gabos na mga napasar na ordinansa kan SP, dakul pa an dai na-iimplementar dawa igwa nang pigcrear na task force ordinansa an City Hall. Napag-araman sa Naga City Police Office (NCPO), an isyung ini haloy na nindang hinahalat na ma-implementar mantang makakatabang pa ini sa campaña contra sa operasyon kan ilegal na droga maging paghanap kan mga suspechado sa mga kriminal na aarestaron. Maging an Liga nang mga Barangay pabor na ipasunod na an sinambit na ordinansa nganing madali nindang maaraman an mga pangaran kan familia na nag-eestar sa saindang lugar.