Isyu sa pagnombra nin brgy officials makakaabot sa SC

April 6, 2017

 

Sangguniang Panlunsod vs pagnombra

Dawa makalusot sa congreso an ley na ma-uktaba kan pirilian sa barangay asin matugot sa pag-nombra nin mga oficiales de barangay maabot pa ini sa Corte Suprema nganing cuestionon an legalidad kaini.
 
Ini an mga punto ni Bise Alcalde Nelson Legacion, pamayo kan Sangguniang Panlungsod kan Ciudad nin Naga sa isyu kan pag-uktaba kan barangay election asin pagnombra nin mga oficiales de barangay.

An Local Government Code nagsasabi na dapat mag-eleksyon sa barangay  cada ika-tolong taon, alagad an codego na pinasar kan congreso ano man na oras puedeng enmiendahan.  Igwa naman dapat helingon digdi kun  konstitusyonal an pagnombra nin mga oficiales de barangay dawa na ngani mayo sa prohibisyon kan 1987

constitution na nagtutokdo sa mga oficiales de barangay bilang elihido asin nangangahulogan dapat nag-oocupar sinda kan puesto bako sa virtud kan pagnombra envez sa paagi nin eleksyon, sabi kan bise alcalde.

Alagad sinabi pa ni Legacion na sarong abogado  mayo pa ini sa jurisprudence huli kaini kun makapasar sa congreso an pag-uktaba kan barangay election asin manombra na sana kan oficiales de barangay  puedeng cuestionon an isyu sa pinakalangkaw na corte kan nasyon.

Madale an pag-enmienda kan Local Government Code kumpara sa pag-enmienda kan kunstitusyon huli ta maagi pa ini sa referendum.

‘Mayong naheheling na problema sa pagpadagos kan oficiales de barangay bilang hold over capacity alagad sa pag-nombra igwang isyu legal’’  

Sa paglibot-libot kan oficiales lokal kan City Hall sa mga barangay, ipinahayag na contra sa plano kan administrasyon na magnombra nin barangay officials mas mahalaga man giraray an itao sa tawo an deretso na magpili kan lider kan saindang comunidad.

‘Para sakuya an deretsong pagboto, sagradong deretso asin dai puede na saro lang na tawo an masabi o madikta na papatukawon na lider’.

SP NAGCOCONTRA SA PROPUESTONG

  PAGNOMBRA NIN BRGY OFFICIALS

Nagpaluwas na nin oficial na panindugan an lokal na gobierno kan Ciudad nin Naga sa paagi kan pinasar na resolucion sa Sangguniang Panlungsod  kan Martes, Abril 4 na saindang pig-ooponer an propuestong bill sa Camara-Baja sa pagnombra na sana nin barangay officials.

An resolucion enot nang pinapadrenohan kan tolong dating barangay kapitan kan ciudad na ngonian nagtutukaw bilang miembros kan SP na sinda Julian Lavadia Jr. Elmer Baldemoro, asin Vidal Castillo asin man kan presenteng nagtutukaw na pamayo kan Liga na si Tomas Ramon Sanchez Jr, alagad bilang nagkakasararo laban sa propuestong bill naging joint and collection motion.

Dai sinda nagcocontra sa pag-uktaba kan eleksyon alagad dai sinda nag-uuyon sa pag-nombra huli ta mahahalian nin deretso an tawo sa pagboto nganing magpili kan saindang lider sa comunidad.

An pagboto, sarong sagradang deretso asin dai puedeng saro lang na tawo an masabi kun siisay an mamamayo kan sarong lugar, sabi ni Consejal Lavadia.

Igwa nang pendienteng House Bill 5359 na pigplantiar ni administration Congressman Robert Barbers na nag-uuktaba kan Barangay asin SK elections envez kan Octubre 23, 2017 pigtalaan sa Oktubre 2020 asin dapat taposon na an termino kan mga nagtutukaw na oficiales de barangay tanganing tawan nin buelo si Presidente Rodrigo Duterte sa pagnombra nin officers in charge.

Nakatalaan padarahan kan copya kan sinambit na resolucion iyo an Malacañan, Senado, Camara-Baja, mga Sangguniang Bayan, Panlungsod asin Panlalawigan nganing magpasar kan kaparejong resolucion.                                              (DPA)

 

Share on Facebook
Share on Twitter
Please reload