NOMBRADONG BRGY. OFFICIALS: Didiktahan magcampaña sa federalismo

April 6, 2017

 

Sarong estratihya kan administrasyon Duterte an pag-uktaba kan eleksyon asin pagnombra nin barangay officials nganing kapot ninda an 42 mil na kapitanes de barangay na gagamiton magcampaña pabor sa pagribay kan presenteng sistema nin gobierno pasiring sa federalismo.

Ciertong gagamiton an nombradong oficiales de barangay na maging sunod-sunodan sa dikta kan administrasyon huli ta ano man na oras pueding ribayan sinda kun dai masuporta sa ano man na kagustohan kan gobierno mientras na decidido si Presidente Rodrigo Duterte na itulod an federalismo.

Ini an naheheling na motivo kan gobierno ninda dating Liga nang mga Barangay President asin ngonian regular na miembros kan Sangguniang Panlungsod kan Ciudad nin Naga, Consejales Vidal Castillo asin Julian Lavadia Jr.

Dawa paboran kan congreso an federalismo maagi pa ini sa referendum na kaipuhan an bilog na suporta kan barangay officials nganing marealisar an pigtutulod na pagribay kan presenteng

presidential form of government pasiring sa federalismo.

An gabos na bagay kan presenteng administrasyon nasyonal ginigibo nganing marealisar an saindang kagustohan dawa na ngani contra sa kamawotan kan tawo na dapat magdanay an sagradong boto sa pagpili kan oficiales de barangay, sabi man ni Lavadia.

Sa propuestong House Bill ni administration Congressman Robert ‘Ace’ Barbers, saiyang pigtutulod na i-uktaba an barangay asin SK Elections envez kan Ocktubre 23, 2017 dapat gibohon na sa Oktubre 2020 asin dapat ribayan na an nagtutukaw na barangay officials nganing tawan poder si Presidente Duterte na magnombra nin officers in charge.  

An deretsong pagboto sarong sagradong  asin dai puede na saro lang na tawo an masabi kun siisay an dapat mamayo kan sarong barangay, sabi pa ninda Castillo asin Lavadia.  

Si Liga ng mga barangay President Tomas Ramon ‘Bong’ Sanchez kan Ciudad nin Naga, nagsabi na sa mga ginibong asembliya sa barangay an pagpaliwanag dapit sa pigtutulod na federalismo pigmamando sa sainda kan DILG alagad kadakle kan kapitanes de barangay kulang sa pagkasabot kan bagong sistema kan gobierno envez pig-presentar sana sa paagi nin video clip.

An mga nag-aatendir sa barangay assembly dai man interesado sa isyu sa bagong sistema kan gobierno mala ngani mayong naghapot, mayong nagtaong reaksyon asin mayo man nagcontra.

Sinda Castillo, Lavadia asin Consejal Elmer Baldemoro iyo an nangenotan sa pagpadreno sa resolucion na pusog na kinokontra kan consejo an propuestong pagnombra nin barangay officials.

Sinabi ninda an propuesto ley sa congreso na tugotan an pagnombra na sana nin barangay officials , kinakastigo kan administrasyon Duterte an namamanuan nganing hubaan sinda  kan saindang deretsong suprahiyo.

Kun an dahilan na cuarenta (40) por ciento kan lideres sa barangay envuelto sa droga, an maninigong aksyon sangatan nin caso asin castigohon kan corte base sa ley, sabi pa.









 

Share on Facebook
Share on Twitter
Please reload