5 decadang basurahan sasarahan na kan City Hall

May 4, 2017

7 brgy afectado kan kalbaryo

 

 

Puponan na ngonian na bulan nin Mayo 2017 an pagsara kan setenta por ciento kan cuatro hektaryang limang decada nang Balatas dumpsite alagad nag-apelar an lokal na gobierno kan Ciudad nin Naga sa pag-andam kan mga apektadong residentes asin laoman an malaen na alisngaw kan parong sa paghiro kan basura sa laog nin 180 diyas. Nag-atubang sa press conference an mga oficiales lokal na pinangenotan ni Alcalde John Bongat, Bise Alcalde Nelson Legacion, City Engr. Leon Palmiano IV asin Engr. Joel Martin, pamayo kan Solid Waste Management Office nganing saindang ipaliwanag sa publiko an pagsara kan dumpsite na nacontrata kan C.D. Garay Construction hale sa Ciudad nin Pasig, alagad mayor na apektado kan malaen na alingasaw sa basura iyo an mga residentes sa barangay kan Concepcion
 
Pequeña, Concepcion Grande asin Del Rosario kun amihan an dalagan kan duros mientras na kun habagat an tatamaan iyo an Barangay San Felipe asin Pacol.

Sa enot na duwang semanang paghiro kan basura piglalaoman an kalbaryo sa dumpsite sa grabeng alisngaw kaini sa mga afectadong barangay, sabi ni Engr. Martin.

Gagamitan nin duwang bulldozer an paghiro kan basura na may  langkaw na kaagid kan anom na escalon na edificio.

Sinabi ni Alcalde Bongat na dapat ma-intindihan kan afectadong residentes kan ciudad an katuyohan kan City Hall huli ta iyo na ini an matapos kan haloy nang reclamo sa malaen na alisngaw na parog gikan sa basurahan.

Marerealisar man giraray sa presenteng administrasyon an problema sa basura afuera kan pagkaigwa nang enot na mga material recovery facilities (MRF) sa 17 kan 27 mga barangay kan ciudad nganing mabawasan an toneladang basura na binabagsak sa dumpsite.

An matatadang 30 por ciento iyo muna an gagamiton na aponan nin basura mientras na ipapatrabajo na an sanitary landfill sa Barangay San Isidro na piglalaoman matatapos an trabajo sa pagsara kan dumpsite igwa nang bagong lugar sa aponan basura.

An C.D. Garay Construction iyo an ganador sa ginibong pagpasubasta kan proyecto na ginibo kan Diciembre 21, 2016 asin kan Abril 17, 2017 pig-isyu na an notice to proceed na madurar nin 180 diyas o anom na bulan an trabajo kan contratista, alagad matabang an oficina ni Engr. Palmiano asin Engr. Martin kan SWMO sa kasugoan kan jefe ejecutivo nganing mapadali an pagsara kan cincuenta y saes años nang tambakan na basura.

Sinabi pa kan jefe ejecutivo matabang an SWMO sa contratista sa pag-spray nin deodorizer mientras na pinapatag an basura nganing mainaan an sungaw kaini.

Igwang sadiring Laboratoryo nin Bio Naga Inoculant an SWMO sa laog kan dumpsite na iyo an ginagamit sa pang-spray kun pighihiro an basura nganing dai mag-alisngaw an malaen na parong.

Alagad an City Hall nakatalaan maghanap pa nin supplier nin deodorizer tanganing makatabang sa trabajo kan contratista asin daing gayo afectado an publico sa alisngaw kan basura.

Tatahobang nin daga an basurahan nganing matamboan nin duot asin maibitaran na maghuros an basura, afuera kaini magibo nin drainage sa palibot kan basurahan asin igwang ibubugtak na water treatment facility nganing malinig an ihuhulog na tubig sa salog Naga, sabi ni Engr. Palmiano.

Pig-alerto na an medical team kan City Health Office komo pagpaseguro sa posibleng maafectaran na residentes sa mga barangay.                                                         (dpa)

  
 

Share on Facebook
Share on Twitter
Please reload