Plastic bags ibabawal na

May 4, 2017

 

Dai na tutugotan kan lokal na gobierno kan Ciudad nin Naga an paggamit nin mga plastic bags oras na maaprobaran an ordinansa na maimponer nin mga penalidad na nakasunad na sa committee level kan Sangguniang Panlungsod.

Si Bise Alcalde Nelson Legacion nagpahayag na base sa osip kan Solid Waste Management Office (SWMO) kan City Hall veinte cinco por ciento kan noventa toneladang basura na nakokolekta aroaldaw gikan sa commercial district maging sa residential area naghahale sa plastic component asin maninigo na digdi an ordinansa na ma-regulate na sa pag-usar kaini.

Pigtulod na an ordinansa kan nagtalikod na SP asin naigilid sana alagad sa presenteng consejo sa dai mahahaloy tutokaron na nganing aprobaran mientras na nag-agi na nin mga konsultasyon sa Committee on Environment and Energy, sabi pa kan bise alcalde.

An SWMO sa pamamayo ni Engr. Joel Martin nagpapabor sa pendienteng ordinansa mientras na an basurang plastic dai nalalapa saro sa nakakaulang nganing maghuros tolos sa irarum an mga tambak na basura sa Balatas dumpsite.

An tambak na basura sa dumpsite may langkaw na nin kaakid sa anom na escalon na edificio na saro sa causa na dai tolos na irarum an basura huli sa hibog kan nakokolectang mga plastic.

Padagos na inuusar kan mga establisimiento de negosyo sa ciudad an
mga plastic bag na pampatos sa binakal na mga produkto sa sainda, alagad kaipuhan ribayan ini nin pampatos na nalalapa nganing makabawas sa toneladang basura na nakokolekta aroaldaw, sabi kan SWMO.

Sinabi kan bise alcalde asin pamayo kan SP na piglalaoman niyang makakahawas na an propuestong ordinansa sa Committee on Environment and Energy ni Consejal Salvador Del Castillo na iyo an padreno nganing matukar na sa en banc session.

An pendienteng ordinansa iyo an ‘’Ordinance prohibiting the use of plastic bags on drt goods, regulating its utilization on wet goods, and providing penalties for violation thereof’

Sa seksyon 8 -  maimponer nin mga penalidad sa arin man na persona asin establisimiento de negosyo na masinutil sa arin man na probisyon kan ordinansa asin kakastigohon nin multa;  Sa enot na pagkakasala – Php 500,  sa ika duwang pagkakasala – Php 1,000 asin sa ika tolong pagkakasala – Php 2,000 alagad kun establisimiento de negosyo, cacancelaron an business permit asin license to operate sa laog nin sarong taon.

Sinabi man kan pamayo kan komite na natapos na an mga ginibong committee hearing alagad hinahalat ninda an isusumiter na mga komento kan manlaen-laen na sektor kun pabor o contra sa pagbawal sa pag-usar nin plastic bags.

Sa propuestong ordinansa envez kan plastic bag dapat gamiton an cloth bag o katsa na ginagamit na sako sa arena, woven bags o mas midmid sa bayong na parejong nalalapa.                                                                                  (dpa)





 

Share on Facebook
Share on Twitter
Please reload