DPWH problemado naman sa mga ilegal na estractura

May 11, 2017

 

Dai pa ngani napapahale kan Department of Public Works and Highways (DPWH) an mga poste kan Camarines Sur II Electric Cooperative (Casureco II) alagad problemado naman sa mga ilegal na estractura sa gilid kan tinampo asin sa gilid kan salog Naga sa sakop na propriedad kan gobierno asin sainda nang hinagad an tabang kan City Engineer’s Office kan City Hall.

Si Assistant District Engr. Richard Ragrario kan 2nd Engineering District kan DPWH na may oficina sa Baras, Canaman, Camarines Sur nag-osip sa Sangguniang Panlungsod kan mga ilegal na estractura sa gilid kan salog mantang

nagpapadagos an road widening project sa Barangay San Felipe afuera kan pinagarabang kaharongan na delicado nang magrampahog alagad habo pang gabaon kan mga may kagsadiri.

An oficina kan 2nd Engineering District kan DPWH invitado ni Bise Alcalde Nelson Legacion pamayo kan SP sa ginibong sesyon regular kan Martes, Mayo 9, 2017 nganing hagadan nin paliwanag sa mga pigrereclamong mga ilegal na estractura.

Segun sa DPWH an Peñafrancia - San Felipe road parejong national road na an lakbang kan tinampo dapat veinte metros alagad an road widening sinagad muna sa lakbang na quince metros asin igwa pang walat na 2.5 metros sa mag-ibong na gilid kan tinampo na igwa naman pinatindog na harong mantang si dating pinagabang harong na sadiri nin mga squatters habo pang haralion na pueding liwat naman na estaran.

Sa sinambit na lugar kinakarkulong labi sa treintang mga ilegal na estractura an nakatirindog afuera kan mga ulang na poste kan Casureco II.

TABANG KAN CITY ENGINEER’S

KAIPUHAN KAN DPWH

Yaon na sa trabajo kan City Engineer’s Office kan City Hall an pagpaharale kan mga ilegal na pigpapa-construhir na edificio mientras na mayo sindang building permit huli ta yaon na ini sa natad kan ciudad mantang sa lado kan DPWH igwa man sinda pinadarang noticia sa mga envueltong persona na habong magharale sa sakop na propriedad kan gobierno.

Huli kaini, pinaapod ni Bise Alcalde Legacion si City Engr. Leon Palmiano IV nganing hagadan man nin paliwanag asin malinawan an isyu sa mga ilegal na estractura.

Sinabi ni Palmiano na an Building Officials kan ciudad pueding magpadarang noticia sa envueltong persona alagad mayo sindang poder na magpagaba kan ilegal na estractura.

Alagad puede nindang ipapundo an ilegal na patrabajo kun mayong building permit, kun kinakaipuhan ipagaba dapat magsangat caso sa corte para ipa-demolish, sabi pa ni Palmiano.

Si Consejal Vidal Castillo, pamayo kan Committee on Infrastructure sa sangguniang nagsabi na igwang ordinansa an lokal na gobierno na an arin man na madadakop na ilegal na nagpapaconstruhir nin edificio puedeng arestaron asin ikulong sa carcel sa laog nin anom na oras.                               (dpa)



 

Share on Facebook
Share on Twitter
Please reload