NFA rice nagkukulang na

May 11, 2017

 

Na-aalarma na an mga National Food Authority (NFA) sa manlaen-laen na provincia digdi sa rehiyon Bikol maging sa iba pang rehiyon sa pagkulang kulang nin stock nin bagas kan agencia matapos ipapundo kan administrasyon Duterte an pag-angkat nin bagas sa ibang nasyon asin kinakaipuhan na an 250 metrico toneladang bagas nganing macierto an suficienteng stock

Igwang fondo para sa palay procurement an gobierno alagad an mga paraoma envez na ipabakal sa NFA an saindang inaning paroy, dinadara na sa pribadong comprador mantang mas halangkaw an presyo kan paroy na tinotungod ninda sa mga paraoma na cantidad P18 hasta P20 cada kilo alagad sa NFA nakapako sana sa P17.20 cada kilo.

Magkukulang na an food security kan agencia asin an saro sa temporaryong solusyon ninda na limitaran muna an pigsusuplay na NFA rice sa mercado asin sa mga retailers kaini sa mga barangay.

Kan mga nakaaging bulan sa saindang palay procurement program nakakabakal sinda nin 60 mil hasta 80 mil na sakong paroy aroaldaw gikan sa paraoma alagad sa ngonian abot na sana sa on por ciento an saindang nababakal.

Ini an kinumpirmar ni Camarines Sur NFA Provincial Manager Yolanda Navarro ki Congresista Gabriel H. Bordado kan tercer distrito kan CSur asin sa nagkaperang miembros kan media sa Ciudad nin Naga.

Kun dakul an suplay kan NFA rice sa mga mercado nakakatabang ini nganing maging estable an presyo kan commercial rice alagad kun mayo nang imported rice ciertong magpaparalangkaw an presyo kan bagas sa mercado.

An kawaran nin imported rice asin kulang an nagpapatungod nin paroy sa mga NFA bako lang digdi sa Bikol an apektado alagad sa enterong nasyon na kaipuhan an dugang na suplay na 250 metrico toneladang bagas, segun pa sa NFA.

NFA NAGHAHAGAD TABANG SA CONGRESO

Pigbuyagyag pa kan  NFA Provincial Manager na naglalaom siya kan tabang ni Congresista Bordado nganing makaabot an isyu sa gobierno nasyonal asin sa congreso.

An legislador nagpahayag na an problemang ini sa suplay nin bagas asin sa isyu sa rice importation saiyang dadarahon sa congreso sagcod na paagihon niya sa privileged speech.

Pig-osipon pa ni Navarro na igwa na sana sindang stock na 13,840 sakong bagas sa bodega kan NFA sa Pili, Camarines Sur. An satong provincia nakaka-consumo nin labi sa 13 mil na sakong bagas sa laog nin tolong aldaw, kun ini gagamiton mauubos an saindang stock sa laog nin tolong aldaw.

Saiya pang sinabi na sindang mga NFA Provincial Manager sa manlaen-laen na provincia nagdudulot sa mga congresista lambang distrito nganing ipaabot an sinambit na problema.

Digdi sa CSur an saiyang enot na nadulok iyo si Bordado asin isusunod niya an iba pang legislador kan Camarines Sur.

Dinagdag pa kan NFA oras na iimplementar na kan DSWD an pagdistribuer ayudang bagas sa mga benepisyaryo kan 4Ps kinakaipuhan an 162 mil na sakong bagas cada bulan sa Bikol. Dai pa kaayon digdi si binabakal na bagas sa sainda kan mga district jail o BJMP asin LGUs.                                                                                    (DPA)







 

Share on Facebook
Share on Twitter
Please reload