Sarong alcalde, dating alcalde, bise alcalde asin Kgd sa CamSur hinale

May 11, 2017

 

Pig-implementar na kan DILG Bikol an dismissal orders kan Ombudsman sa apat na mga oficiales lokal kan Camarines Sur alagad nagpahayag na nakatalaan magplantiar nin motion for reconsideration.

Si Alcalde Melquiades Gaite kan Baao, CSur nagsunod sa orden na maghale sa puesto alagad nagsayumang recibihon an dismissal order envez nagpahayag na maplantiar siya nin motion for reconsideration nganing ipadagos an laban legal.

Nagribay sa saiya iyo si Bise Alcalde Jeff Besinio asin pinasumpa na sa oficina kan DILG bilang full-fledged municipal mayor.

An orden kan Ombudsman pig-implementar kan Lunes, Mayo 8, 2017 ni Abogado Zalman Uddin, pamayo kan Legal Division kan oficina rehiyonal kan DILG.

An pagsipa sa puesto sa jefe ejecutivo kasunod kan casong grave misconduct and conduct prejudicial to the best interest of the service na sinangat ni Consejal Dante Bismonte kan kaparejong banwaan.

Sunod na aldaw pig-serbe kan DILG an dismissal orders ki dating Alcalde Antero Lim, Bise Alcalde Alfredo Gonzaga asin topnotcher Councilor Alex Camacho, gabos kan LGU Goa, CamSur.

Si topnotcher Councilor Abogado Andy Rivero iyo na an pinatukaw kan DILG komo bise alcalde.

Naprobaran kan Ombudsman na igwang sisimbagon sa casong gross neglect of duty, conduct prejudicial to the best interest of the service, huli kan dai awtorisadong mga pagpalta sa saindang trabajo bilang elihidong oficiales lokal.

Naging ugat kan caso contra sa sinambit na oficiales lokal asin iba pang envuelto sa casong serious illegal detention and/or malicious mischief na sinangat kan campo kan mga Fuentebella matapos kan pirilian lokal kan Mayo 2013.

Kan Febrero 24, 2015 an corte nag-isyu nin mandamiento de aresto contra sa tolong oficiales lokal kan Goa asin iba pang mga respondiente, perang bulan sindang nagtago sa awtoridad alagad ibinasura kan Department of Justice an caso kan Oktubre 2015 saka nagbutwa asin nagbuelta sa trabajo sa LGU.  

Si dating bise alcalde Propecio Pena kan LGU Goa iyo an nagsangat nin caso contra ki Lim, Gonzaga asin Camacho.

An sinambit na mga sinipa sa puestong oficiales discualificado nang magpugol nin posisyon sa gobierno asin cancelado an saindang civil service eligibility   



 

Share on Facebook
Share on Twitter
Please reload