1.57% kan mga nagsukong dorogista naglaog sa rehab

May 18, 2017

 

Ciudad nin Legaspi -  Sa rinibong envuelto sa ilegal na droga na nagsuko sa mga awtoridad sa Kabikolan nag-abot sana uno punto cincuenta y siete por ciento (1.57%) an naglaog sa community-based rehabilitation programs.

Sa listahan kan Bikol PNP asin kan Philippine Drug Enforcement Agency (PDEA), sinabi ni Sr. Inspector Ma. Luisa Calubaquid, regional spokesperson kan Camp General Simeon Ola puon na magsikad an Oplan Tokhang kan Julio 1, 2016, igwa sanang total na 1,107 (1.57%) sa 70,759 na mga nagsuruko an naglaog sa community-based rehabilitation programs alagad an 191 kaini an nakatapos na sa programa.

Sinabi pa igwang viente (20) mga dorogista na nasa categoria bilang ‘’severe cases’’ an piglaog sa duwang pribadong rehabilitation centers asin duwa sa pampublikong rehabilitation centers sa rehiyon Bikol.

Duwa sana an rehab centers sa Bikol na kinababalehan kan nasa sa Malinao, Albay asin sa San Fernando, Camarines Sur na parejong limitado sana
sa sinto cincuentang (150)  bed capacity.

An paciente kinakaipuhan magbayad nin P3,000 cada bulan asin kun sa laog nin anom na bulan na pagpabulong magastos nin P18,000.

Dakul na mga familia na may aking lolong sa droga daing kakayahan na magbayad kan sinambit na cantidad.  

Pigseserne kan PNP katuwang an Departmento de Salud kun siisay an dapat ipasairarum sa rehabilitation asin detoxifaction mantang kulang asin limitado an espasyo kan rehab center.

Afuera pa kaini, kabale sa proceso iyo an orden kan jusgado antes tugotan an lolong na sa droga na ilaog sa drug rehab center.

Puon kan Julio 1, 2016 hasta Abril 30, 2017, igwa nang 77,161 na mga nagsuroko asin an 77,161 digdi mga lalake asin 3,800 mga babae. Abot sana sa 6,509 na mga nagsuko mga nagtutulak nin droga  asin 70,659 mga paragamit, sabi pa kan Camp General Simeon Ola.

An Bikol igwang kagabsan na 3,471 na mga barangay alagad an 578 digdi considerado bilang inaapod na drug affected alagad sa pinakahuring listahan kan Bikol PNP, nag-abot na 508 barangay an declarado na kan PDEA komo drug clear.

An halangkaw na acomplisimiento kan Bikol PNP asin PDEA resulta kan guerra contra droga puon na magtukaw sa Malacañan si Presidente Rodrigo Duterte kan Julio 1, 2016.

Alagad sinabi ni Chief Supt. Melvin Ramon Buenafe, jefe kan Bikol PNP dawa rinibo na an mga nagsuko asin nagkadarakop magpapadagos an saindang guerra contra droga.  



 

Share on Facebook
Share on Twitter
Please reload