Illegal vendors dagdag problema sa trafico sa burokasan klase

May 18, 2017

 

Duwang semana antes kan burokasan nin klase sa Junio 5, amay nang pig-aandaman kan Committee on Transportation kan Sangguniang Panlungsod an problema sa trafico alagad nadagdagan ini kan ilegal na mga paratienda sa atubangan kan entrada kan mga escuelahan.

An komite na pinamamayohan  ni Consejal Joselito Del Rosario pig-miting kasuodmang aga sa Blue Room kan City Hall an mga school principal sa elementarya asin segundarya sa manlaen-laen na escuelahan na presente man an pamayo kan Traffic Division kan Naga City Police Office asin Public Safety Office.

Inaram kan consejal sa mga principal kun ano an saindang recomendasyon sa problema sa trafico na iyo an piglalaoman na sasabaton sa burokasan nin klase.

An reclamo kan mga escuelahan iyo an illegal parking, pagpababa nin pasajeros sa atubangan kan entrada na iyo an nagiging causa kan pagkapiriot nin trafico.

An lakdang kan komite iyo na dapat magtarabangan an barangay tanod, PSO asin NCPO asin iba pang paagi nganing mabawasan an reclamo sa trafico alagad haros kadakle sa pig-oosip kan school principal iyo an pagpasaway kan mga illegal vendors.

Kabale sa nagpaabot kaini iyo an Naga Central School I asin II, Camarines Sur National High School, BISCAST, Calauag Elementary School asin iba pang mga pampublikong escuelahan.

Sinda nagwawarak pa nin basura envez na magtabang sa kalinigan, sabi pa sa reclamo.

Igwa man naghahagad na bugtakan nin barandilya harani sa saindang escuelahan nganing ulang sa trafico asin seguridad sa estudiantes alagad an NCPO dai man nag-uuyon digdi mientras na sainda nang pinapangalad.

An gabos na nakolektang reclamo asin recomendasyon ipapaabot sa oficina ni Alcalde John Bongat nganing gigibohan aksyon kan ciudad asin NCPO.  










 

Share on Facebook
Share on Twitter
Please reload