SABI KAN DPWH: Ordinansa maninigo na vs illegal parking sa nat’l road

May 18, 2017

 

Kinakaipuhan magpapusog nin ordinansa an lokal na gobierno kan Ciudad nin Naga nganing sitaron an nagdadanay na illegal parking nin pribadong vehiculos sa mga pinahiwas na national road kan Department of Public Works and Highways (DPWH).

Afuera kaini, dapat maghiro man an Traffic Management Group (TMG) nganing magtabang na ma-implementar an mga reglamento sa trafico na
padagos sinisikwal kan ibang pasaway na motorista.

An isyung ini pinaabot ni Assistant District Engineer Richard Ragrario kan 2nd Engineering District kan DPWH sa Baras, Canaman, Camarines Sur sa saiyang pag-atubang sa sesyon regular kan Sangguniang Panlungsod sa mga reclamo contra sa ilegal na estractura sa mag-ibong na gilid kan tinampo hale sa Brgy Peñafrancia Ave. hasta sa Brgy. San Felipe.

Sinabi pa nganing magamit na segurado an viaje kan mga motorista asin makalikay sa ano man na aksidente maninigo na an ordinansa kan LGU para mahale na an mga illegal parking na iyo an nakikinabang kan natapos na road widening sa Peñafrancia-San Felipe na parejong sakop kan national road.

Pigrereclamo pa na igwang mga may sadiring nin vehiculos na mayong sadiring garaje envez an gilid na tinampo ginibong parking area.

An DPWH padagos nag-iimplementar kan mga road widening na may sukol nin veinte metros hale sa tahaw alagad dawa igwa man pribadong lote na titulado iyan lalaogon kan patrabajo sa tinampo.

Hale sa Peñafrancia, San Felipe, Pacol, Carolina hasta Panicuason, pinapahiwas an national road digdi asin pasiringon pa sana sa Pacol hale sa San Felipe. Naheheling na an paghiwas kan tinampo sa Brgy. San Felipe alagad ginibong parking area kan mga pribadong vehiculos, sabi pa ni Ragrario.

Sa isyu sa poste kan Camarines Sur II Electric Cooperative (Casureco II), sinabi pa na an saindang oficina central kan DPWH sa Manila pighahalat an magiging desisyon.

Dakul na mga poste kan Casureco II an nakaka-ulang sa pinahiwas na national road, alagad an lokal na manijamiento kan cooperativa nagsasayumang garaboton ini sa dahilan na magastos sinda nin dakulang fondo.

Sinabi kan DPWH na dai kabale sa mga road widening project an fondo para sa pag-garabot asin pagbalyo kan poste.                                                                                            (DPA)




 

Share on Facebook
Share on Twitter
Please reload