SP nagpaabot nin enhorabuena sa Bb. Pilipinas Universe 2017

May 24, 2017

 

An Sangguniang Panlungsod kan Ciudad nin Naga tinawan reconocimiento si Miss Rachel Peters, na sarong Bikolano asin dating residente kan Kalye Putol sa Brgy. Bagumbayan Sur, kan ciudad na ini sa pagkakaguno kan Binibining Pilipinas Universe 2017 na nagdara nin dakulang onra asin prestihijo sa Ciudad asin Camarines Sur.

Pinangenotan ni Consejal Vidal P. Castillo an

pagpadreno kan resolucion sa sesyon regular kan Martes, Mayo 16, 2017 na suportado kan gabos na miembros kan SP.

Igwa man nin suhay na resolucion an Sanguniang Panlalawigan kan Camarines Sur sa pag-apreciar asin pagpa-abot nin congratulations sa Bikolanang Binibining Pilipinas mantang sa SP kan ciudad pinapaabot ninda an suporta na may titulong  ‘’A resolution expressing deep appreciation and heartfelt congratulations to Miss Rachel Peters, A Bicolana who was a former resident of Jacob Putol Street in Barangay Bagumbayan Sur, this City, for garnering the Binibining Pilipinas Universe 2017 and for bringing honor and prestige to Naga City and Camarines Sur, and likewise declaring full support in her pursuit to gain another crown in the upcoming Miss Universe 2017 pageant’’, sabi sa resolucion ni Consejal Castillo.

An Bb. Pilipinas Universe mainit na sinabat kan mga oficiales lokal kan ciudad na pinangenotan ni Bise Alcalde Nelson Legacion kan magcortecia ini sa City Hall kan Sabado, Mayo 13 asin nag-motorcade haling Canaman, Camarines Sur, Naga sundo sa Capitolyo Provincial kan CamSur kaibanan an saiyang boyfriend, Gobernador Migz Villafuerte.

Si Peters pig-kuronahan komo Binibining Pilipinas 2017 na ginibo sa Araneta Coliseum kan Abril 30, 2017.

Siya aki ninda Nigel Peters, sarong British-Australian asin kagsadiri kan Midas Promotions, asin Mrs. Annie Obregon Peters, na taga Brgy. Iquin kan municipalidad kan Canaman, CamSur,  nag-escuela sa British School sa Phuket asin naggraduar bilang International Baccalaureate, siya nagpasiring sa La Trobe University sa Austrialia nganing magtapos kan saiyang Bachelor of Business, major in Tourism and Events.

An Sanggunian reconocido an kapangganahan na nakua kan magayon na Bikolana na pig-oorgullo kan namamanuan kan ciudad asin Camarines Sur, asin kan Kabikolan.                                                                                (DPA)




 

Share on Facebook
Share on Twitter
Please reload