Catanduanes, abaca capital kan kinaban

May 25, 2017

 

CATANDUANES, Camarines Sur --- Turismo asin paghaman nin mga proyekto tanganing magkusog an produksyon nin abaca an padagos na pigtatawan ngonian nin atensyon kan administrasyon ni Gobernador Joseph Cua.

Sinabi kan gobernador na itinotolod niya an programang ini tanganing makapag-krear nin dakol na empleyo an lokal na gobierno nin Catanduanes asin makamtan an marhay na ekonomiya sa nasambit na lugar na bistado na ngonian sa apod na Happy Island.

Inomaw ni Regional Director Nini Ravanilla durante kan formal na pagbukas kan Abaca Festival an nasambit na plano kan lokal na gobierno kan provincia.  “Naheheling ko na an lakdang na iyan ni Governor Cua iyo an magiging llave tanganing mailaag sa mapa an Catanduanes bilang saro sa mga bagong lugar na dinadayo nin mga bisita, magin local o foreign tourists man.

Sa ngonian, an Pilipinas igwa nin abaca production na minacompuesto kan 85% share sa interong kinaban asin 40% kaiyan an hale sa provincia kan Catanduanes.

Ipinahayag ni Executive Director Kennedy Costales kan Philippine Fiber Industry Development Authority (PhilFIDA) na komitido siya na tabangan an gobernador tanganing madoble an produksyon kan abaca sa laog kan provincia, siring man sa iba pang rehiyon kan Pilipinas, sa paagi nin bagong sistema na kun saen anom na steps lang an aadaptaron tanganing maging makusog asin dakol an produksyon kan nasambit na produkto.   

Pigbuyagyag ni Costales na kaipuhan makapagproducir an nacion nin dagdag na 35, 000 metric tons nin abaca tanganing mataparan an kinakaipuhan na supply o projected demand na maabot sa 90,000 MT kada bulan.

Nangako pa si Costales ki Governor Cua asin sa 12,000 na abaca farmers kan provincia na tatabangan kan PhilFIDA an Catanduanes na magkapagproducir nin abaca na igwa nin word-class quality.





 

Share on Facebook
Share on Twitter
Please reload