Polinga gana sa protesta sa pirilian vs Alcalde Ondis

May 25, 2017

 

Sarong taon matapos an pirilian lokal kan Mayo 9, 2016  base sa pagrebisar kan mga voto, si Carina Ramos-Polinga iyo an pigdeclara kan jusgado bilang ganador na alcalde kan Siruma, Camarines Sur susog sa narecibing mga validong voto.

An desisyon kan corte iyo an hinahalat kan mga constituentes nganing maging trangkilo na an banwaan sa ngaran na politica envez magtrabajo na an oficiales lokal.

Sa  pinaluwas  na desisyon kan Mayo 18, 2017 ni Juez Pedro Redona kan RTC Branch 63 sa Calabanga, Camarines Sur sa Election Protest Case No. 16-008, na pigplantiar kan protestante Carina Ramos-Polinga contra ki Sandy Ondis sa pirilian lokal kan Mayo 9, 2016 sa banwaan nin Siruma, CamSur.

An banwaan na ini maabot sana sa diez mil an rehistradong votantes na naging haranihan si mga voto ninda Ondis asin Polinga, alagad sabi kan corte sa caso sa protesta sa pirilian, an ganador si candidato na nakakua nin inaapod na plurality of the valid votes cast, sa casong ini si Polinga, na nakalamang nin 44 voto.

Si Polinga, tolos man nagsangat nin Motion for Execution Pending Appeal sa paborableng pinaluwas na desisyon kan jusgado mantang si Ondis nagsangat man kan saiyang Notice of Appeal.

Haros nakasabay an promulgasyon perang oras matapos kan pinaapod na press conference kan nakatukaw na Alcalde Sandy Ondis sa sarong restaurant sa Ciudad nin Naga na nag-aacusar nin pagtutudok suboot kan juez nin cantidad P430,000 karibay nin paborableng desisyon sa election protest.

An cuarta naitao suboot sa juez base sa casong Gross Misconduct and Dishonesty na pagbalga sa Code of Judicial Conduct na sinangat ni  Ondis sa Corte Suprema.

An grupo kan miembros kan media matapos kan sinambit na press conference nagprobar na hagadan nin reaksyon an juez alagad nagsayuma nang mag-atubang sa entrevista.



 

Share on Facebook
Share on Twitter
Please reload