Bikol, pigbandera sa full alert status kan PA, PNP

June 1, 2017

 

Dawa harayo na an rehiyon Bikol sa Mindanao alagad an Philippine Army asin Philippine National Police sa Bikol parejong mantenido an ‘full alert status’ kasunod kan declarasyon nin Martial Law sa Mindanao ni Presidente Rodrigo Duterte huli kan nagpapadagos na krisis sa Ciudad nin Marawi.

Si Capt. Randy Llunar, jefe kan Division of Public Affairs Office (DPAO) kan 9th Infantry Division, kan Philippine Army sa Bikol na may base sa Camp Elias Angeles, Pili, Camarines Sur nagpahayag tanganing maseguro an paz y orden asin seguridad contra sa mga kalaban kan gobierno maninigo na ipadagos an full alert status sa anom na mga provincia kan Kabikolan na yaon sa laog kan area of responsibility kan 9th ID.

Si Major General Manolito Orense,

Commanding General kan 9th ID nagpaluwas nin directiva sa gabos na mga pamayo kan PA sa Kabikolan na dapat maging andam sa ano man na paghasok nin kariribokan kan mga rebeldeng New People’s Army.

An NPA iyo an numero unong kalaban kan militar digdi sa Bikol asin segunda sana an Maute group na iyo an nagpaparibok ngonian sa Marawi City, sabi pa ni Llunar.

Saiyang pig-ehemplo si nangyaring pagsabog nin improvised explosive device (IED) sa Barangay Pinaglabanan, Goa, Camarines Sur kan nakaaging Mayo 29 na target  kuta kan mga rebelde NPA iyo nag-aging military truck lunad an mga soldados gikan sa Alpha Company, alagad masuerteng mayong natamaan na soldados.

Sa Camp Simeon Ola, si Regional Director Melvin Ramon Buenafe, jefe kan Bikol PNP nagsabi na igwa na siyang directiva sa gabos na mga provincial director asin jefe de pulicia na dapat 24/7 maging alerto contra sa mga kalaban kan gobierno na posibleng maghasok nin kariribokan.

 Nagsugo an pamayo kan Bikol na dapat doblehon an seguridad sa kanya-kayang AOR dawa dai kabale an Kabikolan sa pigdeclarang Martial Law ni Presidente Duterte.

Sa instruksyon kan RD sa mga Provincial Director, sinabi pa na dapat maging marikmat sa kapalibotan contra sa arin man na armadong grupo asin dapat magbugtak nin check point.

Mga police visibility sa mga matawong lugar, terminal, aeropuerto, mall, simbahan asin iba pa dapat pakusogon, sabi pa.







 

Share on Facebook
Share on Twitter
Please reload