Presyo kan bagas malangkaw

June 1, 2017

 

Pili, Camarines Sur -  Kulang na an pigsusuplay na sinakong bagas kan National Food Authority sa mga NFA rice retailers sa mercado asin sa mga barangay na an epekto kaini iyo an paglangkaw sa presyo kan commercial rice na piglalaoman mamateon kan consumedores sa mga bulan nin Junio, Julio asin Agosto.

An  NFA Camarines Sur sa  pamamayo   ni     Provincial Manager Yolanda Navarro nagkumpirmar na kritical na an saindang stock nin bagas huli kan mayo nang pig-aangkat na bagas an gobierno nacional asin kulang pa an saindang nababakal na paroy sa mga paraoma mientras na mas halangkaw an presyo kan binabakal na paroy kan

mga pribadong comprador.

Sinabi man ni Assistant Provincial Manager Nora Follosco, na nagbawas nin cincuenta por ciento an saindang pigdidistrubuer na sinakong bagas sa mga NFA rice retailers sa mercado asin sa mga barangay. Pighalimbawa kaini kun si dating viente sakong bagas cada semana nganing dai maubos tolos an saindang stock sa bodega ginibo nalang na sampolong sako.

Dakulang bagay an regular na pigsusuplay na NFA rice sa mga mercado huli ta an presyo kaini P28 cada kilo na nagcocompetencia sa presyo kan commercial rice nag-aabot na sa P35 hasta P43, sabi pa kan NFA CamSur.

Afuera pa kaini, piglalaoman na magkukulang naman an stock nin mga commercial rice sa bodega kan pribadong negociantes matapos makaabot sa kaaraman kan agencia na igwang darakulang negocianteng bagas sa Ciudad nin Davao asin Cotabato nag-aangkat nan in bagas sa Rinconada area asin sa ibang mga banwaan sa segundo asin tercer distrito kan Camarines Sur nganing darahon sa Mindanao.

Igwa pang nagkukuang suplay nin bagas sa segundo distrito na dinadara sa Ciudad nin Bacolod na pinapaagi sa barko sa Pasacao, Camarines Sur, sabi pa ni Follosco.

Sinabi pa na base sa saindang inventaryo kan Mayo 19 igwa na sanang 18 mil na sakong stock na bagas asin dai na ngani ini masarong semanang consumo.

Sa palay procurement program kan bulan nin Marso, Abril asin Mayo kan nagtalikod na taon nakakabakal pa sinda nin hasta 130 mil na sakong paroy gikan sa mga paraoma alagad sa kaparejong peryodo 7 mil sakong paroy na sana.

Alagad napag-araman kan NFA Bikol na an saindang oficina central mapipiritan nang mag-angkat nin bagas sa nacion kan Vietnam nganing maseguro an food security kan mga tawo.

An pagpundo kan gobierno nacional sa pag-angkat nin bagas huli man sana sa orden ni Presidente Rodrigo Duterte alagad sa ngonian na realisar na igwang negatibong epekto sa suplay.                 (DPA)





 

Share on Facebook
Share on Twitter
Please reload