PATANID KAN LTFRB: PUV na mayong paradahan dai na tatawan franquicia

Ciudad nin Legazpi - An Land Transportation Franchising and Regulatory Board (LTFRB) sa Bikol estricto nang pig-iimplementar an sarong memorandum circular kan saindang oficina central na dai na tatawan nin franquicia an arin man na pampasajerong sasakyan kun mayong sadiring paradahan vehiculo. Si LTFRB Regional Director Jun Abrasaldo, dai palang nahahaloy nag-asumir sa puesto nakarecibe na kan copya memorandum circular na efectivo kan Febrero 10, 2017 nagpatanid na sa mga operator na kun mayong sadiring parking area an saindang pampasajerong sasakyan dai na makaka-renew kan saindang franquicia maging si bagohan na mga aplicante. Kabale sa probisyon kan MC No. 2017-004 An operator dapat magpresentar nin prueba na an parking area igwang titulo an lote na nakapangaran sa operator, an hiwas kaini asin kun nag-aarkila nin daga o lote ipaheling an documento sa contract of lease. Sinabi pa na kaayon digdi iyo an utility van asin truck. An sinambit na MC pinaluwas kan junta kan LTFRB na pinamamayohan ni Abogado Martin Delgra III. Napag-aram an Land Transportation Office nag-iinpeksyon man sa mga garaje kan mga public utility vehicles kun nagsasabing totoo sa mga documentos an mga operator na saindang pigsusumiter sa LTFRB. Sa Ciudad nin Naga, si Consejal Joselito Del Rosario pamayo kan Committee on Transportation sa Sangguniang Panlungsod nagpahayag na tama sana an ginigibong estrictong pulicia kan LTFRB sa tahaw kan nagkaperang mga operator nin PUV na ginigibo nindang parking area iyo an gilid kan mga tinampo na iyo an nagiging causa kan problema sa trafico. An consejal igwa nang mga propuestong ma-enmienda kan ordinansa sa traffic code kan lokal na gobierno alagad maagi pa sa mga public hearing antes isunad sa en banc session kan SP. Sinabi ni Del Rosario katuyohan kaini nganing mapakarhay an dalagan kan trafico sa tahaw kan padagos na nagdadakul an mga vehiculos na nag-lalaog sa mga commercial district. An consejal na igwang kaaraman sa pagmanijar nin trafico iyo an natukahan ni Alcalde John Bongat sa pag-adal kan problema sa trafico sa ciudad. (DPA)