MNCCI saludo sa City Report 2017 ni Bongat

June 15, 2017

 

An  pagtalubo kan economia lokal asin proteksyon sa mga negociante sa Ciudad nin Naga  mala ngani nakarecibe nin mga onra an lokal na gobierno asin kabale na sa mga bilyonaryong ciudad sa Filipinas alagad nalingawan an ginigibong solusyon sa problema sa trafico.

Ini an reaksyon ni Gilbert Albero, pamayo kan Metro Naga Chamber of Commerce and Industry (MNCCI) matapos kan ginibong State of Our City Report 2017 ni Alcalde John Bongat kan Martes, Junio 13.

Sa isyu sa trafico igwa nang hinahaman an Sangguniang Panlungsod sa paagi kan pag-enmienda kan ordinansa sa trafico.

Haros pinakusog kan mga narecibing awards kan City Hall an paglobo kan economia na dakulang bagay sa sektor nin negociantes asin namamanuan kan ciudad mala ngani nagkapera naman na darakulang mall hale sa Manila an nagbugtak kan saindang establisimiento.

Saro sa pinakahuring narecibing onra kan City Hall gikan sa Manila Times, na nagtaong special awards sa ciudad sa pagpahalaga kan ngaran na economia, huli kan marhay na naginibohan nganing mapalangkaw an ingreso sa Naga City People’s Hall (NCPM), na nagsakat si ingreso sa P55 milyon sa total na revenues kan 2016.

Afuera kaini, an dating Central Bus Station na ngonian Bicol Central Station, nagging malinig napakarhay an terminal sagcod nagkaigwa sinda nin P45 milyon na revenues kan kaparejong taon.  

Kaayon pa sa pig-omaw iyo an treintang taon (30) na urban development plan na hinahanap kan sinambit na sektor na dapat gibohon man kan ibang mga banwaan asin ini kasumpay na kan ambisyon 2040 sa pang nacional na programa kan National Economic Development Authority.

Kabale sa State of Our City Report 2017 kan jefe ejecutivo iyo an saiyang mga naginibohan sa laog nin pitong taon; ini kinababalehan kan pagtutok sa Health and Nutrition, Housing and the Urban Poor, programa sa edukasyon, arts, culture and development, peace and order, livelihood, employment, business and human development, cleanliness and environmental protection , transparency, accountability, people empowerment and good governance.

An alcalde nasa ika-tolo asin huring termino na matatapos sa 2019  napakusog an pagtarabangan kan grupo na inaapod Team Naga.                                                                                                      (dpa)




 

Share on Facebook
Share on Twitter
Please reload