P4.7M fondo sa bagong edificio kan Naga PNP

June 15, 2017

 

An loma nang edificio kan Naga City Police Office (NCPO), na panahon pa nin tiempo Japon nakatalaan nang gabaon nganing ribayan nin bagong edificio na igwa nang nakatagamang P4.7 milyon hale sa Kampo Krame.

Si Regional Director Chief Supt. Melvin Ramon Buenafe nagsabi na mientras na maretiro na siya sa serbisyo sa PNP sa Julio ngonian na taon pigtawan niya nin prioridad sagcod na piriton sa Kampo Krame na tagamahan nin fondo an construksyon kan bagong edificio kan NCPO na namumugtak na gayo sa commercial district kan ciudad.

An pamayo kan Bikol PNP midmid na dayupot ki PNP Chief Director General Ronaldo Dela Rosa na ginibo niya an espuersos komo taga Ciudad nin Naga para marealisar na an pagkaigwa nin lalawgon kan NCPO na haloy nang pangiturogan kan mga

nakaaging City Director.

Nakatalaan pang ipasubasta an ipapatindog na bagong edificio asin pueding matapos an construksyon sa laog nin anom na bulan oras na ponan na an patrabajo kan proyecto.

Sa saiyang mensaje sa ginibong ground breaking ceremony kan Junio 9, 2017, sinabi kaini an Ciudad nin Naga bilang inaapod na Heart of Bicol maninigo nang magkaigwa nin bagong edificio an NCPO huli ta perang decada na an ginagamit na cuartel kan pulicia kan ciudad.

Sa sinambit na programa presente an iba pang oficiales kan Bikol PNP, NCPO asin si Consejal Joselito Del Rosario na iyo an nagrepresentar ki Alcalde John Bongat.

Dawa perang bulan nalang siya sa serbisyo an iba pang Police Station sa Bikol na mayong sadiring edificio kaipuhan matabangan mientras na yaon pa sa puesto si PNP Chief Dela Rosa alagad puede  maghagad pa siya nin tabang sa ibang oficiales sa gobierno nacional, sabi pa.

Abot na sa 17 bagong mga Police Stations asin Provincial Office an na-ipatindog sa Bikol kabale na an PPO sa Camarines Sur na dai palang nahahaloy ginibo an ground breaking ceremony.  (dpa)




 

Share on Facebook
Share on Twitter
Please reload