ISYU SA RICE IMPORTATION: Privilege speech kan congresista kan Cam. Sur igwa nang resulta

Nagkaperang nang mga lehislador kabale si Congresista LRay Villafuerte kan segundo distrito kan Camarines Sur an nagplantiar nin resolucion sa Camara-Baja tanganing mag-conducta nin inquiry in aid of legislation sa isyu sa kamugtakan nin suplay kan NFA rice digdi sa Filipinas. Ini kasunod kan ginibong privilege speech ni Congresista Gabriel H. Bordado Jr. kan tercer distrito kan Camarines Sur sa isyu kan rice importation asin aramon nang dagos an kamugtakan kan mga suporta kan ahencias de gobierno sa mga paraoma tanganing macierto na suficiente an suplay nin bagas sa nacion. Nagkaigwa na nin aksyon an National Food Administration Council asin yaon na sa Committee on Rules asin Committee on Foods and Agriculture an kahagadan kan representante kan tercer distrito kan Camarines Sur na sinda maconducta kan investigasyon alagad inabot nin pagpahingalo kan sesyon an congreso asin magdedefende na sa komite kun matalaan nin inquiry dawa panahon nin ‘’recess’’, sabi pa ni Bordado. An National Food Authority nagpahayag na malangkaw an presyo kan commercial rice sa mga mercado sa panahon nin tinangating o sa mga bulan nin Julio, Agosto asin Septiembre. An bagay na ini pigtawan duon sa ika-sampolong privilege speech kan congresista na magkakaigwa nin epekto sa consumedores huli ta an presyo magdidicta digdi iyo an inaapod na ‘law of supply and demand’, pagnagdikit an stock kan NFA rice magkakaigwang problema sa presyo kan bagas. Prioridad kan NFA maseguro na estable an presyo kan bagas asin macierto an food security nganing encaso magkulang-kulang an bagas igwa sindang ipapaluwas na NFA rice sa mga mercado asin mapugolan an pagparalangkaw kan presyo kaini. Ipinahayag pa kan congresista kan Camarines Sur na dapat aramon kun saen marhay kun an pigsasabi kan NFA na government to government, ini dapat maaraman sa gigibohon na inquiry asin kun ano talaga an pinakamarhay kun mas pabor sa pag-angkat nin bagas sa pribadong negociantes o dapat ipadagos giraray an government to government purchasing of rice. Enot nang pigbuyagyag kan NFA na kun dai ma-angkat nin bagas an gobierno nacional mauubos an saindang stock asin kinakaipuhan na an dugang na 250 mil na metrico toneladang bagas nganing macierto an food security sa Filipinas. (dpa)