Reclamo kan developers vs MNWD, dadangugon kan SP

June 22, 2017

 

Dawa  sarong Government Owned and Control Corporation (GOCC) an Metropolitan Naga Water District (MNWD) alagad kun may nagrereclamo na apektado an consumedores asin an lokal na gobierno igwang deretso an City Hall nganing aramon kun maninigo an saindang pinapasunod na mga policia.

Ini an paliwanag ni Bise Alcalde Nelson Legacion, pamayo kan Sangguniang Panlungsod kan ciudad kasunod kan reclamo na pinaabot sa sainda kan Jamaica Realty and

Marketing Corporation asin iba pang developers huli kan pig-iimponer na kabayadan para sa water source development share na cantidad noventa (90) pesos cada metro cuadrado.

An mga subdivision developers asin an programa sa housing project kan City Hall ciertong apektado kan bagong policia kan MNWD na dai pinaagi sa consultasyon. Kun an manijamiento antes na-imponer nin dugang na singil sa tarifa cada metro cubico pinapaagi ninda sa mga public hearing, ano ta an isyu kan developers dai nag-aaram an publiko sa dahilan na dai pinaagi sa public hearing, sabi pa kan bise alcalde.

 Si Salvador Camposano, AVP for Region V Operations kan Jamaica Realty and Marketing Corporation iyo an nagpaabot kan reclamo sa SP na naghahagad dangugon an isyu huli kan epekto sa  mga developers asin mabakal kan lote sa subdibisyon na iyo an mapasan kan dugang na gastos alagad para sa benipisyo kan MNWD.

An isyu kan developers nakatalaan dangugon kan Committee on Public Utility asin Housing and Resettlement kan Sangguniang Panlungsod na pinamamayohan ni Consejal Miles Raquid-Arroyo na nakatalaan magpaapod committee hearing antes isunad sa en banc session kan consejo.

Sa lado kan MNWD, si Acting General Manager Virginia I. Nero nagpaliwanag man ki Camposano sa paagi kan pinadarang surat na kun nag-iimponer sinda kan sinambit na policia base sa Board Resolution No. 50, Series of 2017, dated May 12, 2017.  An Addendum to the MNWD Subdivision Policy was the provision of a Water Source Development Share, which is defined as a portion of investment in water source development paid by developers ‘’as a precondition prior to the turnover of subdivision’s waterline system to the MNWD’.

Afuera kan sinambit na isyu hagadan man nin paliwanag kun ta’no ta nagpagibo nin cantidad P8 milyon na lorry boat alagad dai man napapakinabangan haloy nang pataw-pataw sa Bicol river sa Camaligan, Camarines Sur.   


 

Share on Facebook
Share on Twitter
Please reload