SA CAMARINES SUR: Igwa nang 1.5-M rehistradong votantes sa Brgy., SK elections

June 22, 2017

 

Kun madadagos an Barangay asin Sangguniang Kabataan (SK) elections sa Oktubre 23, 2017 igwa nang kagabsan na 1,499,342 na rehistradong votantes an Camarines Sur base sa pinakahuring listahan kan Comelec sa provincia hasta sa nagtapos na continuing registration kan Abril 29.

Sinabi ni Alexander Marpuri, parataram kan Comelec Camarines Sur naglangkaw nin ocho por ciento an rehistradong votantes kun itatampad kan pinakahuring pirilian nacional asin lokal kan Mayo 9, 2016 na maabot sa labing 980 mil na votantes.

Sa listahan kan Comelec CamSur an tercer distrito na yaon digdi an Ciudad
nin Naga iyo an may pinakalangkaw na numero nin rehistradong votantes sa barangay na igwang 272,135;  nag-ika duwa an ika-limang distrito na yaon digdi an Ciudad nin Iriga igwang 254,038;  ika-tolo an ika-apat na distrito – 242,474;  nagsunod an segundo distrito – 181,798 asin an premir distrito igwang 114,379 na nag-total sa 1,064,824.

Sa listahan kan registradong votantes kan SK, an tercer distrito iyo an pinakalangkaw na numero nag-abot sa 105,521; ika duwa an ika-limang  distrito na yaon digdi an Ciudad nin Iriga igwang 103,000;  ika-tolo an ika-apat na distrito 102,532; nagsunod an ika-duwang distrito – 75,332; asin an premir distrito igwang 48,133 na igwang total na 434,518.

An Comelec nagpapadagos kan saindang preparasyon sa pirilian sa Brgy asin SK sagcod na mayo pang aprobadong ley an congreso na nag-uuktaba naman kan sinambit na pirilian.

Sinabi pa ni Marpuri, sa maabot na Julio 23, 2017 mabilog na sinda kan grupo nin mga paratukdo na maserbe sa pirilian sa Oktubre 23 asin isusunod an pag-subasta kan ballot boxes.

Cada semana asin bulan naggagastos an Comelec para sa maabot na pirilian sa Oktubre magsasayang sana nin fondo an gobierno kun perang semana mapaluwas nin decisyon an congreso sa pag-uktaba kan pirilian.

An commission pigmamandohan sana kan ley na magpaapod nin Barangay asin SK elections kaya ngani nagpapadagos sinda sa mga pag-andam kaini, sabi pa kan Comelec CamSur.

Napag-araman na sinasangat pa sana an propuestong ley sa Camara-Baja sa pag-uktaba kan pirilian alagad dai maaraman kun nuarin ini makakapasar.              (dpa)                                                                         



 

Share on Facebook
Share on Twitter
Please reload