Terorista posibleng maglaog sa Bikol - sabi kan 9th ID

June 22, 2017

 

An establisimiento militar sa Bikol dai hinahale an posibilidad na makalaog digdi sa rehiyon an teroristang grupo gikan sa Mindanao alagad piglinaw na bako man ining pananakot envez dapat maging andam an gabos.

Si Major General Manolito Orense, Commanding General kan 9th Infantry Division kan Philippine Army sa Bikol na nakabase sa Camp Elias Angeles sa San Jose, Pili, Camarines Sur nagpaluwas nin patanid sa publiko kan siya magtaong mensaje sa flag raising ceremony sa City Hall kan Lunes, Junio 19.

Sa sinambit na ceremonya an 9th ID asin an City Hall sa pamamayo ni Alcalde John Bongat magkatuwang na piglansar an proyecto na magkakalap nin mga donasyon finansyal man o materyal nganing ipadarang ayuda sa victima kan giyera sa Ciudad nin Marawi na sagcod sa ngonian nagpapadagos pa an giyera kan tropa kan gobierno laban sa grupo kan Maute.

An pamayo kan 9th ID antes nadestino digdi sa Bikol duwang taon nagserbe sa Marawi asin saiyang pigbuyagyag na bako nang makatawo an ginigibong pang-gagadan kan mga terorista huli ta sinda mga drug addict. Mayo na sa tamang pag-iisip iba na an saindang utak kaya grabe an saindang ginigibong pang-gagadan, abi pa.

Saiya pang pig-ehemplo si nangyaring Mamasapano massacre na saindang naheling si mga victimang awtoridad na nagkagaradan.

Hinagad kaini, sa publiko asin iba pang ahencias de gobierno na dapat maging agresibo sa campaña contra sa ilegal na droga.

An Philippine Army asin Philippine National Police sa Bikol padagos na mantenido an full alert status, epekto kan pagdeclara nin Martial law sa Mindanao ni Presidente Rodrigo Duterte kan magsakyada an teroristang grupo kan Maute kan Mayo 23 sa Ciudad nin Marawi.

Kabale sa pig-alerto iyo an mga aeropuerto, puerto, asin pag-bugtak nin check point sa mga national highway na pueding lusotan kan mga terorista.                                                                                                                 (DPA)




 

Share on Facebook
Share on Twitter
Please reload