Pirilian sa Barangay, SK, dagos

June 29, 2017

 

PalaogON na sa apat na bulan an pag-andam kan Commission on Election (Comelec) antes kan nakatalaan na pirilian sa Barangay asin Sangguniang Kabataan sa Oktubre 23, 2017 dai pa pig-oorolayan sa congreso an pag-uktaba kan pirilian.

Kun ini an babasehan, sa ngonian dagos an pirilian sa Brgy. asin SK dawa igwa nang pigplantiar na house bill na mag-uuktaba kan pirilian nurong taon, sabi ni Congresista Gabriel H. Bordado Jr. kan tercer distrito kan Camarines Sur.

An propuestong ley sinasangat pa sana antes nagpahingalo an sesyon kan congreso kan nagtalikod na bulan nin Mayo 2017 asin piglalaoman na tatawan prioridad sa pagbalik kan 17th Congress sa huring semana kan Hulyo 2017.

 Sinabi pa ni Bordado an bill pigtutulod na an pirilian sa Brgy asin SK gibohon nang Oktubre 2018 envez kan Oktubre 23, 2017.

Sagcod sa ngonian mayo pang aksyon an congreso dai pa nakalaog sa plenaryo yaon pa sa committee level, paghale digdi ilalaog pa sana sa plenaryo para orolayan finalmente kan Camara-Baja asin Camara-Alta. Kun dai pang aksyon an congreso gustong sabihon kaini dagos an pirilian.

An pendienteng bill parejo pang dedebatehan sa duwang sanga kan congreso asin kun makalusot, si Presidente Rodrigo Duterte iyo an maaprobar, sabi pa

An oficina central kan Comelec nagtalaan nang mag-subasta sa masunod na bulan nin Hulyo kan saindang babakalon na mga ballot boxes na gagamiton sa pirilian sa Oktubre 23, segun sa mga pahayag ni Alex Marpuri, oficial na parataram kan Comelec CamSur.

Sa masunod na bulan an mga oficina lokal kan Comelec mabilog na kan mga paratukdo na maserbe sa pirilian mantang sagcod sa ngonian mayo pang decisyon an congreso na mag-uuktaba kan Barangay, Sangguniang Kabataan elections.

Cada semana, cada bulan nag-gagastos an saindang oficina sa pag-andam kan pirilian asin dakulang paghinayang kan fondo kan gobierno kun biglang madecisyon sa pag-uktaba kan pirilian, sabi pa kan Comelec.

Sa Liga nang mga Barangay, sinabi ni Liga President Ramon ‘Bong’ Sanchez kan Ciudad nin Naga na haros natunaw na an propuestong pagnombra na sana nin oficiales de barangay kun ma-uktaba an pirilian matapos magpasar nin resolucion an saindang National Liga na pusog nindang pig-cocontra an pagnombra nin mga officers in charge sa barangay.

Termino kan barangay officials gigibohon
limang taon  

  Dinagdag pa ni Bordado, igwa nang sinangat na propuestong ley na dapat gibohon nang limang taon an sarong termino asin sarong re-election an oficiales de barangay.

Sa presenting codego kan Local Government Code, tolong taon an sarong termino kan oficiales de barangay asin duwang re-elections.

Alagad an propuestong ley sa Camara-Baja maagi pa sa halawig na debate.

Kan nakaaging 16th Congress pigsangat na an kaparejong bill alagad dai man pigtawan prioridad kan nakaaging administrasyon.                                            (DPA)                                                                                                         





 

Share on Facebook
Share on Twitter
Please reload