City Hall pabor sa Bikolanong CD sa NCPO

July 6, 2017

 

Mas prioridad kan City Hall na sarong Bikolando na dati nang Deputy City Director kan Naga City Police Office (NCPO), na magtukaw bilang pamayo kan NCPO karibay kan maretiro nang City Director Sr. Supt. Julius Muñez.
 
Aram an geograpiya asin cultura kan mga Nagueño kun sarong Bikolano an matukaw na CD .

Ini an pahayag ni Alcalde John Bongat sa atubangan kan mga opisyales kan NCPO kan magkortesiya sa oficina kan jefe ejecutivo kan Lunes, Hulyo tres si OIC City Director Sr. Supt. Jonathan Panganiban, karibay ni Muñez.

Sinabi kan alcalde na aram niya na marhay magpalagan asin opisyal kan PNP si Panganiban asin yaon an saiyang tiwala sa suporta kan mga jefe de pulicia kan limang Police Station kan ciudad.

‘’All out support kita sa OIC City Director’’, sabi pa kan alcalde sa atubangan kan mga jefe de pulicia asin OIC CD.

Dinagdag pa kan City Hall kun ano an objetivo kan City Director orog na an campaña sa paz y orden dapat suportaran.

Pig-rerecomendar pa sana kan Bikol PNP si Panganiban na magtukaw muna komo OIC CD mientras na dai pa nakakapili nin permanteng pamayo kan NCPO, pig-uyonan ini kan alcalde, sabi pa.

An Camp Simeon Ola sa Ciudad nin Legazpi kinakaipuhan na magsumiter giraray nin limang nominadong mga opisyal kan PNP sa oficina kan alcalde nganing pagpilian kan magiging permanteng CD, alagad an jefe ejecutivo nag-asegurar na kun kabale an nagtutukaw na OIC CD iyo na ini an saiyang pipilion na  maging permanteng CD.

Sinabi kan OIC CD na magiging efectivo an saindang campaña laban sa ano man na kriminalidad asin pagpadagos kan giyera sa droga sa tahaw kan bilog suporta sa sainda kan City Hall.

Sa ngonian napundo na an operasyon kan mga criminal using motorcycle asin snatching mientras na an mga casong qualified theft asin robbery iyo an may halangkaw na caso base sa listahan kan mga police blotter sa limang Police Station.

Sinabi pa kan alcalde na igwa nang idodonar na lote an City Hall na namumugtak sa Almeda highway sa Barangay Concepcion Grande nganing digdi ihubo an icoconstruhir na bagong Central Headquarter kan NCPO.

Tinawan nang awtorisasyon kan Sangguniang Panlungsod an jefe ejecutivo sa pag-negociar sa NCPO sa idodonar na lote.      (DPA)



 

Share on Facebook
Share on Twitter
Please reload