Krisis sa Marawi binabasol sa LGU

July 6, 2017

 

‘‘Failure of local governance, bakong failure of intelligence kan militar kun nangyari an krisis sa Ciudad nin Marawi na nagpapadagos pa sagcod sa ngonian na posibleng maglawig pa’’
 
An mga politico igwang sadiring mga pribadong army, anas pang drug lord asin malala pa an problema sa kurapsyon kan opisyales lokal alagad kun may nangyayaring kariribokan perming pigbabasol an failure of intelligence.

Ini an mga pahayag sa Bicol Mail ni Alcalde Fermin Mabolo kan San Fernando, Camarines Sur na dating opisyal kan militar asin miembro kan Magdalo kan Philippine Military Academy antes

naging politico.

Sinabi pa na kadakul nang intelligence agency an gobierno, yaon an National Intelligence Coordinating Agency, National Bureau of Investigation iba pang mga ahencia nin awtoridad maging an LGU igwang sadiring intelligence fund na dapat gamiton sa pag-monitor kan mga terorista asin rebeldeng grupo.

Ano ta dai nagcocooperar an comunidad? an dahilan iyo an palpak na lokal na gobierno afuera pa kaini dai malilikayan an kariribokan sa sinambit na lugar mientras na cultura na an perming pagsukbit nin armas.

An alcalde kan San Fernando, kan activo pa sa serbisyo militar duwang taon nadestino sa Lanao Del Sur na yaon digdi an Ciudad nin Marawi nagsabi pa na ‘’dai ma-apresyar tolos kan tawo an kamugtakan duman kun dai nag-estar nin perang taon na talagang masakiton simbagon an problema’’

Huli ta cultura na an pagsubit armas, pagnagbaradilan sa canto gabos masuropurta dahil ta pinsan ninda an binadil kan militar, gabos duman armado.

Pig-ehemplo pa na kun ‘’nagbabakbakan si sarong team kan militar, an kalaban kaiyan, sarong ribo huli ta masurorog si gabos na pagtaraid.

An ilegal na droga iyo an isyu duman bako lang sa rebelyon maging sa terorismo mientras na haros considerado nang centro nin droga an sinambit na ciudad sa Mindanao.

Sa isyu sa kurapsyon, sinabi na igwang nag-osipon na alcalde sa saiya  an mga alcalde duman gabos na Internal Revenue Allotment (IRA) yaon sa personal account bako municipal account, an municipio yaon sa harong alagad pagnadaog sa pirilian si alcalde balyo naman nin harong.

Ano an ginigibo kan Commission on Audit? sinabi pa na sasabaton na sa aeropuerto kan mga alalay kan alcalde asin dagos nang dadarahon sa hotel, libre sa restaurant asin libre an gabos na kaipuhan.  Preparado na an gabos na mga documentos na dapat permihan, alagad kun masayo an patanid bala an karibay.

Sa palpak na pagpadalagan kan lokal na gobierno, ipinahayag pa dai sinda nag-iimplementar nin zoning, tamang pagconstruhir nin mga edificio, durokotan an mga edificio na talagang ideal tagoan  kan armadong grupo nganing maprotehiran sinda kan mga estractura. Huli kaini, kaipuhan an air strike asin bombahon kan militar.



 

Share on Facebook
Share on Twitter
Please reload