RECLAMO VS MGA POSTE SA NATIONAL ROAD: DPWH, DOE ipapaapod sa congreso

Mahiro na an Committee on Bicol Development sa Camara-Baja nganing mag-isyu na nin pinal na desisyon an Department of Public Works and Highways (DPWH) asin Department of Energy (DoE) sa pagresolver kun siisay an magastos sa pagtanggal asin pagbalyo kan mga poste kan mga cooperativa nin electricidad sa ginigibong mga road widening project kan obras publika. Si Congresista Gabriel H. Bordado Jr. kan tercer distrito kan Camarines Sur, Vice Chairman kan Committee on Bicol Development nagsabi na saindang ipapaapod sa congreso si DPWH Secretary Mark Villar asin DoE Secretary Alfonso Cusi asin sa tabang kan Committee on Public Works asin Committee on Energy nganing matapos na an haloy nang problema sa mga estraktura sa tinampo na ulang sa mga proyecto kan DPWH asin delicado pa sa mga aksidente sa trafico kun dai haharalion an mga poste alagad pinahiwas an tinampo. An congresista sa saiyang paglibot sa mga banwaan kan Canaman, Magarao, Bombon, Calabanga, Pili asin Ciudad nin Naga, sakop kan tercer distrito kan provincia maging sa iba pang mga lugar naheling niya an kaparejong mga ulang sa national road apesar tapos na an mga road widening project kan DPWH na peligroso sa aksidente sa trafico. An problemang ini bako lang sa tercer distrito asin Camarines Sur envez sa iba pang mga rehiyon sa nacion sa nagpapadagos na implementasyon kan road widening project, kaya dapat mag-aksyon na an DPWH asin DoE, sabi pa. Nagpaabot na nin reclamo an mga residentes kan saiyang distrito apesar na nagpapadagos an mga proyecto kan obras publika alagad yaon man an mga ulang na poste kan Casureco II, afuera kan natapos nang pinahiwas na national road. Enot nang nagsurat si Bordado sa 2nd Engineering District kan DPWH kan CamSur sa pamamayo ni District Engineer Rebecca Roces na hinahagad temporaryo igilid an implementasyon kan proyecto envez halaton muna an pinal na desisyon kan DoE asin DPWH kun siisay an dapat maggastos sa paggarabot asin pagbalyo kan mga poste. Sinabi man ni DE Roces nagkaperang veces na sindang nagpadarang surat sa Casureco II nganing i-relocate na an dakul na mga poste alagad nagsasayuma huli ta magastos nin milyon pesos an manijamiento kan cooperativa. Pinapadatulang kan Casureco II an implementing rules and regulations kan RA 10531 o mas midmid sa NEA Reform Act of 2013, alagad sinabi ni Roces an pigsasabing IRR bakong retroactive asin an dapat magpasan kan gastos iyo an cooperativa nin electricidad. Afuera pa kaini, sa road widening project dai kabale sa fondo kan DPWH an gastos sa paghale kan mga poste. (DPA)