SA ELECTORAL PROTEST VS LENI: Resulta sa AES dai nababaliktad

July 13, 2017

 

 

Kami sa Commission on Election (Comelec) pigsusuportaran an integridad kan mga nakaaging pirilian kan 2010, 2013 asin 2016 na ginibo sa paagi kan Automated Election System (AES) na masakit asin imposible an alegasyon na nagkaigwang iregularidad sa pirilian.

Sa mga nangyaring protesta sa pirilian kan ibang nagkadaraog na candidato puon na iimplementar kan Comelec an Automated Election System mayo pang record na nabaliktad an resulta kan eleksyon.

Ini an reaksyon kan Comelec Camarines Sur sa paagi kan saindang opisyal na parataram na si Election Officer Alex Marpuri matapos makabale an Camarines Sur sa mga provincias sa electoral protest na sinangat ni dating Senador Ferdinand Marcos Jr. contra ki Bise Presidente Leni Robredo na pigcucuestion an resulta kan pirilian digdi  sa CamSur kan nakaaging national elections kan Mayo 9, 2016.    

Sa mga provincias na may protesta si Marcos nangenotan an Camarines Sur, Iloilo, Negros Orriental asin iba pa.

Sa anom na mga provincia kan rehiyon Bikol an Camarines Sur iyo an balwarte ni Bise Presidente Robredo na nakakua siya nin total na 1,499,597 voto; nagsunod sa saiya iyo si Senador Chiz Escudero – 476,477 voto mantang si Marcos nakakua sana nin 187,233.

Nagtutubod pa an Comelec na sa AES imposibleng mabago an resulta sa mga ginigibong electronics transmition.    

Alagad kun igwang electoral protest sainda nang ipinapaubaya sa Korte Suprema na ginibo na an preliminary conference kan nakaaging Martes, Hulyo 11.

Hinahalat nalang kan Comelec Camarines Sur kun nuarin hahakoton an mga ballot boxes nganing darahon sa Manila asin bibilangon liwat.

Sa entrevista kan media sa Ciudad nin Naga ki Robredo kaibanan an ibang miembros kan media hale sa Manila kan Martes, Hulyo 11, sinabi kaini na mismo na an mga taga Camarines Sur an makakasabi kun may nangyaring darayan kan nakaaging pirilian kan 2016.

Sinabi pa na saiya nang ipinapaubaya an protesta sa Corte Suprema. Sa ginigibong pag-andam, sinabi pa kan bise president ‘’Iyong preparation kasi parati iyong katotohanan, eh. Basta hawak natin iyo katotohanan, hindi naman tayo kailangang matakot.

Kan nakaaging pirilian mantang nagpapadagos an national canvassing an Parish Pastoral Council for Responsible Voting, iniimbitaran si Marcos na magpasiring mismo sa saindang national office nganing ma-monitor an ginigibong vote canvassing.

Ini kasimbagan kan PPCRV kan hinurot ni Marcos sa Comelec na ipapundo an ginigibong unofficial quick count huli sa alegasyon sa ‘’dagdag bawas’’

Si Atty. Romeo Serrano, Provincial Election Supervisor kan Camarines Sur asin iyo an chairman kaidto kan Provincial Board of Canvasser, matapos an pirilian kan Mayo 9 saiyang pigdeclara na nagging matuninong si pirilian digdi sa provincia.

Afuera pa kaini, si PNP Provincial Director kaidto Sr. Supt. Walfredo Pornillos nagsabi na mayo sindang na-ilista na may nangyaring kariribokan kan panahon kan pirilian hasta matapos.    

              (DPA)



 

Share on Facebook
Share on Twitter
Please reload