Bordado nagbiklad na kan mga naginibohan sa congreso

July 20, 2017

 

Si Congresista Gabriel H. Bordado Jr. kan tercer distrito kan Camarines Sur nagbiklad na kan saiyang mga acomplisimiento sa trabajo bilang lehislador asin mga naginibohan sa saiyang namamanuan sa laog kan periodo puon Hulyo 25, 2016 hasta Hulyo 19, 2017.

Bako lang nangenotan sa may pinakadakul na privilege speeches sa mga lehislador, mayong pagpalta sa noventa y seite (97) diyas na sesyon, nakaplantiar nin sampulong local application bills sa noventa y tres (93) na co-authored bills asin nakagibong limang manifestation on the floor na nakatutok sa pagbuelta
kan budget cuts sa 34 state universities and colleges, pagpa-uswag kan farm tourism, asin pagcontra sa death penalty.

Sampulo an saiyang privilege speeches na an isyu sa War on Drugs, Disaster Risk Reduction and Management, PNR Upgrading, Peace Talks, Budget Management, Food Security asin nagkapera pa.

Ini an biniklad ni Bordado sa pag-atubang kaini sa miembros kan media kasuodma mientras na pig-aandam an detalyadong accomplishments report sa gigibohon niyang State of the District Address (SODA) sa enot na semana kan Agosto 2017.    

Kadakle kan saiyang bills nakasunad na sa 3rd reading mantang pigtatawan muna nin prioridad kan congreso iyo an national bills alagad dai siya madidificilan na suportaran kan saiyang pag-iriba nganing makalusot asin maaprobaran mientras nakalinyada siya sa partido kan administrasyon.  

Sa mga naginibohan kaini sa namamanuan kan saiyang congressional district ini kinababalehan kan livelihood/jobs, natawang nin tabang an 1,320ng mga benepisyaryo; sa Health /Medical Aid – 5,312 na asisteran na mga pasyente; nagconducta nin siyam na medical mission asin 950 pasyente an naserbihan.

Nakabilog nin 400 na core members kan Mothers Against Drug Abuse Program; nakadistrubuer 112 wheelchairs sa cooperasyon kan OVP; sa agricultura – nakadistribuer 23,012 seedlings sa 7,670 households sa lindong kan programa sa Gulayan Habang Buhay; nagpa-training sa 2,650ng persona sa pagtanum nin gulayon; sa lado nin educasyon sa paagi kan CHED nakatabang sa 1,349ng tios na estudiantes bilang scholars sa colegio asin nagdistribuer nin 1,095ng school supplies sa pre-school pupils.

Sa infrastructura sa coordinasyon kan DPWH asin Department of Agriculture, nakapagibo nin 12 multipurpose building projects, duwang drainage system asin walong local bridges. Sarong seawall projects, anom na farm- to-market roads, walong flood control systems asin pitong road rehabilitation projects.

Sa Disaster Risk Reduction and Management – nagsusuporta sa province-wide and school-based DRRMP kan DepEd Camarines Sur asin nagtaong communication equipment sa Kabalikat-Calabanga.

Nakabilog kan Youth for Good Governance, sa lado nin environmental protection nakipagtabangan sa DepEd asin DENR nganing maimplementar an school-based Tree Growing projects. Sa Arts and Culture yaon an asistencia sa mga parasurat Bikol sa nabilog na Rambong Bikol.

An iba pang serbisyo kinababalehan kan pagdistribuer nin relief goods asin iba pang ayuda sa 4,750ng kaharongan pakatapos kan bagyong ‘Nina’ asin nakataong ayuda sa 550 constituentes na naghahagad tabang sa saiyang district office asin nagsusuporta sa Bicol Business Month kan Metro Naga Chamber of Commerce and Industry.                                                                                                                                                  
   



 

Share on Facebook
Share on Twitter
Please reload