PROPUESTONG LEY SA PAG-UKTABA KAN BRGY. ELECTION: Uulangon kan Nat’l Liga sa Congreso

July 20, 2017

 

An National Liga nang mga Barangay maatubang sa pagbukas kan 17th Congress nganing ipahayag an saindang pusog na panindugan contra sa propuestong ley na i-uktaba naman an nakatalaan na Barangay Election sa Oktubre 23, 2017 envez isibog sa Oktubre 2018.

Si Brgy. Kapitan Tomas Ramon Sanchez, pamayo kan Liga ng mga Barangay sa Ciudad nin Naga nagpahayag sa Bikol Mail na igwa na sindang inaprobaran na resolucion na nagcocontra sa ano man na planong pag-uktaba kan pirilian asin planong pagnombra na sana kan opisyales de barangay envez kan paagihon sa pirilian.

Sa nakatalaan na pagbuelta kan 17th Congress kabale sa agenda sa mga house bill na tutukaron iyo an pigtutulod na gibohon na an pirilian sa Barangay asin Sangguniang Kabataan (SK) sa Oktubre 2018 envez kan dapat na Oktubre 23 ngonian na taon.

Maatubang an National Liga na pinamamayohan ni Abogado Edmund Abesamis asin pag-iribang opisyales kaini sa ipapaapod na committee hearing sa congreso sa isyu kan pag-uktaba asin posibleng pagnombra na sana nin opisyales kan barangay, sabi pa ni Sanchez.

Andam na an National Liga kan saindang resolucion asin manifesto kun ta’no ta dapat ibasura an propuestong ley sa congreso envez idagos na an nakatalaan na pirilian.

Si Congresista Gabriel H. Bordado Jr. kan tercer distrito kan Camarines Sur nagkumpirmar na igwa nang sinangat na bill antes magpahingalo an sesyon kan Congreso kan Mayo 2017 na nakatalaan tawan prioridad nganing debatehan mientras padagos na an ginigibojng preparasyon kan Commission on Election kan Barangay asin SK Elections.

Piglalaoman mahiro na an Camara-Baja mantang kan mag-recess sinda kan Mayo 2017 dai pa nakakalaog sa plenaryo yaon pa sana sa committee level.

Kun orolayan tolos sa pagbukas kan sesyon sa Hulyo 24 pakahale sa committee level ilalaog sa plenaryo para sa orolayan pinalmente kan Camara-Baja asin Camara-Alta, alagad kun mayong aksyon an congreso sagcod na tikapohon na sa panahon madadagos an pirilian, sabi pa.

Sinabi ni Alexander Marpuri, parataram kan Comelec Camarines Sur an saindang oficina central nag-aandam na kan mga ballot boxes na gagamiton sa pirilian sa Oktubre 23.

Sa isyu sa pagnombra nin opisyales de barangay an National Liga nanindugan contra digdi mientras na mas efectivo man giraray an elihidong opisyales kan barangay huli ta respetado sinda ta nakatukaw sa puesto sa kagustohan kan tawo envez kan tinukdo sana na pagtukaw sa barangay.

Ano man na dikta kan appointing officer iyo an saindang susunodon dawa mayong konsultasyon sa publiko mantang daing gayo ninda prioridad an boses kan residentes kan barangay.

Mas maogma man giraray sa pagmate kan barangay na an nakatukaw sa Brgy Hall napili sa paagi nin pirilian, sabi pa ni Sanchez.    (DPA)

 

Share on Facebook
Share on Twitter
Please reload