Shabu lab hagad investigaran kan DoJ

July 20, 2017

 

Virac, Catanduanes – Matapos makasapog sa casong ilegal na droga an nagkaperang mga prominenteng personalidad sa islang provincia kan Bikol an Sangguniang Panlalawigan digdi nagpasar nin resolucion nganing huroton sa Department of Justice na magkaigwa nin marikas na investigasyon sa shabu laboratory case.

Ini an aksyon kan SP sa pamamayo ni Bise Gobernador Shirley Abundo kasunod man kan mga pahayag sa media ni Gobernador Joseph Cua na dakulang isyu sa saindang provincia an pagkakadiscobre kan dakulang laboratoryo nin shabu na envuelto an mga prominenteng personalidad, kabale na an nagkaperang mga politico.

Kabale sa pigngaranan kan testigo na si Ernesto Tabor Jr., iyo sinda presenteng Vokal Joseph Wong asin dating Alcalde Constantino Cordial kan Caramoan, Camarines Sur alagad an duwa higot na nagpapahimotik kan akusasyon sa sainda.

Si Gobernador Cua, enot naman pig-aacusaran kan saiyang mga karibal sa political na saro sa mga nasa likod kan shabu laboratory, alagad an gobernador tolos man nagpahimotik sa alegasyon.

Si Wong kan mag-atubang sa saiyang pag-iriba sa sesyon regular kan junta provincial kan Catanduanes nag-privilege speech nganing saiyang pahimotikan na envuelto siya sa mega shabu lab operations.

An  shabu lab naconstruhir kan Mayo 2015 na an lote sadiri suboot ni dating anti-illegal drugs chief kan NBI, Atty. Eric Isidoro sa Barangay Palta Small.

Antes nagretiro sa serbisyo si PNP Regional Director Chief Supt. Melvin Ramon Buenafe na-isangat an caso sa corte sa pagbalga sa Acta Republica 9165 o mas midmid sa Comprehensive Dangerous Drugs Act of 2002.

Kabale sa sinangatan nin caso iyo sinda dating anti-illegal drugs chief kan NBI Atty. Eric Isidoro, Atty. Ulpiano Sarmiento; Raymond Lee, Jardin Wong,  Joseph Al Randie Wong, Constantino Cordial, Jr. Snooky Imperial alias Mr. Lee; Allan Ang Hung; Xian Wong; Pido Bonito; Noel Sampag, alias Bert; asin Angelica Balmadrid Isidoro.

An mga suspechado pigpahayag na nagsarabuatan kan dakulang ilegal na negocio nin shabu sa provincia nin Catanduanes.

An iba pang mga envuelto sa droga na kinasohan iyo sinda Paulo Uy, Jayson Gonzales Uy, Paolo Wee Palison, Lorenzo Flores Pinera alias kidot, Phung Yuan Estorco, Sheng Wang Tore, Ruel Samonte, Dennis Samonte asin John and Peter Does.


 

Share on Facebook
Share on Twitter
Please reload