P151B na proyecto sa PNR hagad idetalye kan DOTr

August 10, 2017

 

An Sangguniang Panlungsod kan Ciudad nin Naga sa pamamayo ni Bise Alcalde Nelson Legacion hahagadon sa Department of Transportation (DOTr) sa paagi ni Secretaryo Arthur Tugade nganing idetalye sa City Hall an propuestong P151.3 bilyon na modernong proyecto sa Philippine National Railway South Commuter Line na dakulang bagay sa pag-asenso sa economia bako lang kan ciudad envez sa rehiyon  Bikol.

An kahagadan sa DOTr pigkasuronduan kan miembros kan SP sa paagi nin joint and collection motion sa sesyon regular kan Agosto 8 na pigtulod ni Consejal Julian Lavadia Jr. kasunod kan plano kan administrasyon ni Presidente Rodrigo Duterte na mag-utang nin P140 bilyon sa China nganing gamiton sa mga proyecto sa infrastractura na kun haen an Bikol saro sa makikinabang huli ta bilyones peso an gagamiton sa pagpakarhay kan mga relis  asin serbisyo kan perrokaril.

Perang administrasyon an nagpangako na iimplementar na an proyecto sa PNR alagad sa ngonian dakula an paglaom kan Bikol na marerealisar
na ini sa presenting administrasyon, sabi kan consejal.

An gobierno nacional nagtagama nin bilyon pesos na fondo para sa tolong mga darakulang proyecto na kinababalihan kan Chico river pump na nagcacantidad P2.7 bilyon, P10.9B para sa water source kaliwa dam, asin P151.3B sa PNR na nag-aabot sa total na P164.9B, an nacion kan China mapautang sa Filipinas nin P140B alagad an kakulangan na P29B maghahale na sa sadiring fondo kan satong gobierno, sabi pa.

An dakulang fondo sa PNR gagamiton para sa bagong mga kotse kabale na an rehabilitasyon sa mga relis haleng Tutuban PNR Station sundo sa Matnog, Sorsogon na posibleng iimplementar sa laog kan taon 2017.

Sinabi ni Lavadia an PNR dakulang constribusyon sa pagtalubo sa lado nin economia asin pag-asenso kan Ciudad nin Naga asin Camarines Sur particularmente sa rehiyon Bikol oras na marealisar na an proyecto.

An pagbuhay kan viaje kan perrokaril maogmang bareta sa lokal na gobierno kan ciudad asin namamanuan digdi huli ta mas lalong mauswag an economia na makonectar sa iba pang provincia asin rehiyon kan Luzon.

Interesado an ciudad na maaraman an detalye kan bilyones peso na proyecto sa infrastractura asin kun panong iimplementar, sabi pa kan consejal.

Si Congresista Gabriel H. Bordado Jr. kan tercer distrito kan Camarines Sur sa enot na mga bulan kaini sa 17th Congress nagplantiar na nin house bill para sa modernong pagpkarhay kan PNR bako sanang rehabilitasyon nganing mas efectivo an serbisyo sa rinibong Bikolanong pasajeros.
            
DATING PRESIDENTE AQUINO ENOT NANG NAGTAGAMA NIN P171B

Kan panahon ni Presidente Benigno Aquino III pigtagamahan na nin P171B na fondo na dapat maimplementar ngonian na taon alagad naabala mientras aaboton sa quince hasta veinteng bulan an paggibo kan detailed engineering asin matatapos an proyecto sa laog nin apat na taon o hasta sa 2021 nganing maging operational na an viaje kan tren.

An P171B gagamiton para sa  ’’modernization’’ kan North-South Trail project na mapuon sa Tugegarao hasta sa Matnog, Sorsogon.

Sa mga lugar kan Tutoban, Calamba, Laguna pasiring sa Ciudad nin Legaspi asin mga extension sa Matnog, Sorsogon asin Batangas.

Huli kan bagong plano naman kan bagong administrasyon dapat maaraman kan mga Bikolano an detalye sa propuestong PNR South Commuter Line, sabi pa ni Lavadia.

Sa ngonian an viaje kan commuter train limitado sana haling PNR Station kan Naga hasta sa Sipocot, Camarines Sur.            (DPA)






 

Share on Facebook
Share on Twitter
Please reload