MGA PRODUKTO SA POULTRY FARM SA BIKOL: Bawal itransportar sa Visayas, Mindanao - DA

August 17, 2017

 

Pili,  Camarines  Sur.  Dawa  dai  kabale  an  mga  poultry  farm sa Kabikolan sa mga apektado kan bird flu virus alagad an Departamento de Agricultura (DA) nagpaluwas nin patanid na prohibido an pagtransportar nin mga produkto gikan sa mga poultry farm sa Bikol pasiring sa Visayas asin Mindanao.

Ini an pinaluwas na public advisory ni DA Regional Executive Director Elena B. Delos Santos kasunod kan pig-isyung memorandum circular kan Bureau of Animal Industry (BAI) sa paagi ni DA Assistant Secretary Enrico Garson Jr., petsado Agosto 11.

Katuyohan kaini nganing macierto na dai na magwarak sa ibang rehiyon an  posibleng pagkuriyat kan  virus tanganing dai na maapektaran an dakul pang mga poultry farm mientras na an rehiyon Bikol yaon sa laog kan Luzon.

Alagad piglinaw kan DA na negativo pa sa bird flu virus an mga ataman na hayop digdi sa Bikol asin mayo pang peligro an mga pinapabakal na suplay nin manok sa mercado.

Ipinahayag pa na nag-inspeksyon na an mga meat inspector sa Bikol sa mga mercado nganing segurohon an pinapabakal na produkto sa consumedores mayong defekto asin posibleng virus.

Sa Ciudad nin Naga, agrangay na an mga negociantes sa meat section sa Naga City People’s Mall huli ta naghuros sa diez por ciento an saindang  benta aroaldaw dawa na ngani negativo sa virus digdi sa Bikol. Afuera kaini maging an nagsusuplay sa mga mercado padagos nang nag-aarangay nadagdagan pa kan memorandum circular kan DA.

Sa investigasyon kan Animal and Health Division kan mga personajes sa BAI sa oficina kan DA sa rehiyon tres nakumpirmar an causa kan birth flu reactor na tinamaan na nin avian flu type A virus kan mga manokan sa mga poultry farm sa San Luis, Pampanga.

   Maabot na sa veinte cinco mil an nagadan asin ginaradan asin isusunod pa an sangatos mil na kamanokan na yaon sa laog kan sarong kilometro sa provincia nin Pampanga na pigtutubodan tinamaan na kan virus.

Nagpaluwas pa nin directiva an ahencia na dapat estrictong makontrol an pagpaluwas kan poultry product kabale digdi an pato asin pabo gikan sa Pampanga sa laog kan 7 kilometers radius.




 

Share on Facebook
Share on Twitter
Please reload