PB binadil sa punerarya, gadan

August 24, 2017

 

Binawian man giraray buhay sa hospital sa Ciudad nin Naga an sarong punong barangayy sa San Jose, Camarines Sur matapos pagbabadilon kan riding-in-tandem sa luwas kan saiyang negosyo sa funeral parlor.

An  biktima si Punong Barangay Noel Briones, 47 años, kan Brgy. San Vicente na may tama nin duwang bala kan 38 revolver sa payo asin loong na nabigla an saiyang pagiriba sa harong matapos makadangog nin apat na sunod-sunod na putok nin badil.

An Municipal Police Station sa pamamayo ni Chief Inspector Romeo Ranara nagpahayag na kabale sa angulo sa saindang ginibong investigasyon iyo

an posibleng motivo huli sa relasyon sa ibang babae, sa negosyo asin NPA.

Sinabi kan MPS an insidente nangyari mga alas 6:30 nin banggui kan Martes, Agosto 22 matapos magkakan nin pabangihan nagluwas  sa  pintoan palaog sa funeral service na kataid kan saindang residencia alagad biglang nagrani an mga suspechado nganing pagbabadilon an biktima.

   Naghahanap pa nin mga testigo  an  awtoridad nganing mamidmid an responsable sa krimen asin masangat nin caso sa corte.

An esposa na si Jocelyn asin sarong kaibanan na aki nagkabirigla kan insidente na naghagad nin tabang sa pagtaraid na harong nganing madara sa Mother Seton Hospital sa Ciudad nin Naga alagad pasado alas 9:00 nin banggui binawian nin buhay.

Premiro pa sanang termino sa barangay kan biktima na dai paman pigbuyagyag kun igwa nang dating homa sa buhay antes kan panlilikidar.




 

Share on Facebook
Share on Twitter
Please reload